Aizawlah World Rivers' Day hmang

Save Chite Lui Coordination Committee (SCLCC) leh State NSS Office, Mizoram chuan October 1, Thawhṭanni khan Assembly Annexe conference hall-ah 'World Rivers' Day' an hmang a, Assembly deputy speaker R Lalrinawma'n a hmanpui. Thupui chu 'Ka Chite lui, ka ram rohlu, ka humhalh ang’ tih a ni.

R Lalrinawma chuan, Chite lui chhan chhuah hna thawhnaah a tlai hman lek lek tih sawiin, "Tih loh ai chuan tlai pawh a ṭha zawk, tih angin, tuna kan beih loh chuan he lui hi Mizo hnam hian kan chán hlen dawn a ni. Aizawl khawpuiah ṭhangtharte tan hawi thawvenna tur hmun ṭha a tlem a, Chite lui leh a chhehvel hi chutiang atana hmun ṭha leh duhawm takah siam theih a ni," a ti.

Mizoram Legislative Assembly-in Chite Lui Act a pawm hnuah hian Chite lui kam tuak meter 50 chhunga leivûng leh bawlhhlawh paihte hremna a nat thu sawiin R Lalrinawma chuan, "Mizoram hmun tinah lui leh tuihna humhalh kawngah kan ṭhangharh mek a ni," a ti a; túr leh bomb laka lui dung venhim rualin, tuai hnûm leh chei ṭhat a ṭul thu a sawi.

Aizawl Municipal Corporation (AMC) mayor PC Lalhmingthanga chuan inlawmna thu sawiin, Save Chite Lui Coordination Committee hmalakna hrang hrangte tarlan a ni a; kal khawmte'n Miss Mizoram 2018 T Ramthanmawii kaihhruaiin Chite lui puala thutiam an chham a ni.

United Nations Organisation-in kum 2005-a Water for Life Decade bul a ṭan ruala khawvel puma hman ṭan World Rivers Day hi September Pathianni hnuhnung berah hman ṭhin a ni a; bul ṭantu chu Canada mi, lui humhalh kawnga hmingṭha Mark Angelo a ni.