Chhim lam tana MYC pisa thar hawng

Mizoram Youth Commission (MYC) chairman Joseph Lalhimpuia, MLA chuan nimin khan Mizoram chhim lam tana MYC hmunpui tur, ‘MYC Southern Mizoram Zone’ chu Lunglei Venglaia SSA pisa chung berah a hawng.

Pisa hawn inkhawmah hian Joseph Lalhimpuia chuan, "MYC Southern Mizoram Zone hi chhim lam mipui, a bik takin ṭhalaite tan kawng eng­kima hmasawnna thlentu a nih ngei ka beisei. Lehkha zirna leh eizawnna kawng inkawhhmuhna hmunpui tura ruahman a ni a, ṭhalai tam zawkte'n tumruhna nen hlawhtlinna an hmuh ngei kan beisei a ni," a ti.

MYC Chairman chuan, hlawhtling turin rinawmna, taimakna leh tumruhna a pawimawh thu sawiin, "Khawi hmunah pawh mi hlawhtlingte chu hlawhchhamna an tawh cháng pawha beidawng duh loa bei ṭâng ṭâng, mi tuarchhel leh taimate an ni," a ti a; MYC chuan ṭhalaite khawvel zauh kawngah theihtawp an chhuah mek zel thu a sawi.

Office hawnnaah hian MYC founder chairman ZH Ropuia chu khual­zahawm a ni a; ZH Ropuia chuan MYC din turin sorkar laipui hotute ṭum eng emaw zat an dàwr thu sawiin, "Din a nih theihna atan Mizoram Youth Commission Act, 2008 duan a ni," a ti a, MYC chu an kal zelna tura duhsakna a hlan.

MYC Southern Mizoram Zone hnuaiah hian Alternative Learning System (ALS)-in UPSC online coaching an kalpui a; SSC coaching, IBPS (banking), NEET leh IIT-JEE coaching-te ngawrh taka kalpui mek a nih bakah, ṭhalai 500 chuang leh sipai tan tumte training leh zirtirna pek mek a ni. MYC Southern Mizoram Zone zirlaite aṭangin IBPS prelims exam mi 25-in an paltlang a, MPSC (Combined Competitive) Exam prelims pawh mi pangain an paltlang a ni.