MLA aṭangin Lalrinliana Sailo a bâng

Tuichang bialtu MLA Lalrinliana Sailo chuan nimin chawhnu dar 1 khan MLA aṭanga bànna, Assembly speaker Hiphei hnenah a thehlut a, nimin chawhnu vêk khan Congress party aṭanga bànna a thehlut bawk. MLA aṭanga bânna hi Assembly Speaker chuan a pawm nghal. Lalrinliana Sailo chuan MNF party a zawm dawn tih a sawi.

Lalrinliana Sailo-in MLA aṭanga bànna, Assembly Secretariat-a Speaker hnena a thehluhnaah hian Congress party leh vice president aṭanga bàn tâk R Lalzirliana, Ṭawi bialtu MLA bakah, MNF MLA pali - Vanlalzawma, K Sangṭhuama, Lalruatkima leh Lalrinawma leh, MNF hruaitu dangte'n an ṭawiawm a ni.

MLA aṭanga bânna a thehluh zawha chanchinbu mite'n a bàn chhan an zawhna chhángin Lalrinliana Sailo chuan, "Zoram hi kan ram a ni, tih kan sa ve châk tawh alawm," a ti a; a bânna chu Speaker-in a pawm nghal avangin MNF party-ah a luh tur thu sawiin, "October 5, Zirtawpni-ah ka lut ang," a ti.

MNF party aṭangin Assembly inthlanpui awm turah candidate a chan dawn leh dawn loh zawhna chhangin, "Kan pute thu thu a ni ang chu," a ti. Zawhna dang chhangin, MLA dang MNF party-a lut tur an awm leh awm loh a chian loh thu a sawi rualin, lungawi lo neuh neuh erawh an awm thu a sawi a; Congress MLA Whatsapp group aṭanga paih (remove) a nih chungchangah, "A, kan leng ta lo a ni ang e," tiin a sawi.

Lalrinliana Sailo chuan, a bial chhungah Khawzawl district puan a nih thu leh chu chu Congress sorkarin a tihpuitlin theih loh thu sawiin, "Ka bial mipuite zahna leh an duh ang tihhlawhtlin nan ka bâng a ni. MNF chuan district hi tihhlawhtlin an tum. District tihpuitlin hi thil har a ni lo a, mithiamte'n a har lo an ti. Sum mamawhte pawh budget-ah dah mai theih a ni," a ti.

Mizorama Congress party chhungkuaah lal chhungkaw rorelna a awm anga sawi chungchanga zawhna chhangin Rinliana Sailo chuan, "Mizoramah pawh lal chhungkua hi a lâr a, mahse, kei chuan ka hre ve lem lo," a ti.

Narendra Modi-a'n India ram chu lal chhungkaw pakhat enkawl turin in phal em ni, tia a tlangau ṭhin avangin ṭhalaite an harh phah thu leh, Assam-ah pawh lal chhungkua chu an buai phahna leh Congress party tlak phahna a nih thu a sawi.

Lalrinliana Sailo chuan, Congress sorkar thuvawn, 'Rorelna dik chu luipui angin luang se la...' tih chu ama rawt chhuah niin a sawi a, "Ram thuvawnah kan hmang chho a ni. Mahse, hei hi tunah hian a ni ta chiah loin ka hria," a ti.