State pumah Maxicab-te an nuar

Mizoram Maxicab Owners Association (MMCOA) chuan maxi­cab chuan man tihsan phûtin nimin aṭang khan tiam chin awm loin nawrh an huaihawt a, Mizoram pumah maxicab-te an ding. Transport minister John Rotluangliana chuan, MMCOA-in nawrh an huaihawt chu pawi an tih thu sawiin, titawp turin a ngen.

Vanglaini palai zawhna chhangin MMCOA president C Lalthanmawia chuan, "Nawrh hi kan chhun­zawm zel dawn. Sorkar lam aṭangin thu thar dawn kan nei lo a, kan thil phût tihhlawhtlin a nih hma chuan maxicab-te kan tlantir lo zel ang," a ti.

Hetih lai hian Tran­sport Minister chuan nimin khan Rajiv Nagar-ah thu sawiin, "MMCOA-te thil phût, rate tihsan chungchangah hian tuna an rate hman lai hi May 22, 2018 aṭanga hman ṭan chauh a ni a, thla 4/5 chauh kan la hman avangin ennawn leh a ni rih lo," a ti.

John Rotluangliana chuan, all Mizoram permit chungchangah, "Tun atan chuan Mizoram sorkarin ṭul rihah a ngai lo a, a chhan chu, maxi cab-te hi line bik neiin an service ṭheuh a, chumi kara all Mizoram permit nei bik a, duh duhna hmun an tlan bik hi thil ṭha berah sorkar chuan a ngai lo," a ti a; MMCOA-te chu mipui tana an rawngbawl nana service an ni tih inhre reng a, nawrh titawp turin a ngen a ni.