Eirûk awm lohna sorkar kan siam ang - BJP National GS

BJP National general secretary Ram Madhav chuan, Mizoramah BJP-in sorkarna an siam a nih chuan Mizoram sorkar chu eirûk awm lohna sorkar a nih tur thu a sawi.

Ram Madhav hian nimin khan Hotel Regen­cy-ah thuthar thehdarhtute a kâwm a; BJP thupui chu 'Mizo mipuiten an duh change a thleng tur a ni' tih a nih thu sawiin, "Sorkar ṭha, ṭhalaite tana chhenfâkawm, hmasawn­na ruhrel ṭha siam tur sorkar kan din ang. Inkal­pawhna kawng ṭha kan siam ang a, damdawi-in leh zirna pawh kan tichang­tlung dawn a ni," a ti.

Mizoramah chief minister Lal Thanhawla'n hmasawnna a thlen lo nia sawiin Ram Madhav chuan, "Kawng hrang hrang­ah mipuite'n harsat­na an tawk a, Aizawl dawta khawpui lian pahnih Lunglei leh Champhai ka tlawh a, mipui mamawh tihhlawhtlin a awm lo. Damdawi-in changtlung leh zirna-in lian pawh a awm lo," a ti a; sorkarna an siam chuan khawpui pahnih hi an tihchangtlun tur thu a sawi.

BJP General Secre­tary chuan, prime minis­ter Narendra Modi kaih­hruaina hnuaiah India ramin hma a sawn mek nia sawiin, "Mizoram pawhin Central aṭangin ṭanpuina a hmu ṭeuh a, hmasawnna tak tak a awm chuang lo. Central-in lo neitute tan scheme ṭha tak a nei a, chu'ngte chu Mizorama lo neitute'n an dawng lo. Medical facility ṭha pawh in nei lo," a ti.

Ram Madhav chuan BJP chu mipui tana ding an nia sawiin, "BJP hi min han sorkartir ve chhin teh u. Kan party Anti-Christian-a min puhnate hi dâwt mai mai a ni. Sorkarna pawh siam ula, Mizo mipuite tho a ni sorkar hotu turte. Sakhaw hrang hrangte kan zah a, a venhimna kan thawk. Mite ei tur duh zawngah pawh inrawlh kan tum lo," a ti a; state chu state chhung mipuite kaihhruai tur a nih thu a sawi.

Mizoram chu rambuai­ah hun rei tak chhung a awm thu sawiin BJP General Secretary chuan, "Rambuai vanga harsatna tâwkte chhawmdawlna mumal pek an ni lo a, kan sorkar chuan kan pe vek dawn. Rambuai chhunga ram leh hnam tana theihtawp chhuaha beitu­te hi kan zah a ni," a ti.

Ram Madhav chuan, political party dang nena an inbiak mek thu sawiin, "Kan thawkho thei lo a nih pawhin BJP chuan inthlan kan hmachhawn dawn tho tho. NEDA-ah MNF leh NPP-te an tel a, hei vang hian kan thawkho dawn tihna a ni lo. NEDA hi development alliance a ni a, election alliance a ni lo," a ti a, NEDA-a tel party-te chu hmun ṭhenkhatah chuan an inkhin tho thu a sawi.

Zawhna chhangin Ram Madhav chuan, seat an chuh zat tur an la tihfel loh thu sawiin, "A tam thei ang ber chuh kan tum. Bru awm awm tamna lam kan en bik chuang lo a, hmun hrang hrang kan en. Mizoram sorkar lo piang leh tur hi BJP tel lohna sorkar chu a ni lo ang," a ti.