India rama state fai inelnaah Mizoram parukna a ni

India rama thingtlang khaw fai inelna, Swachh Survekshan Grameen 2018-ah Mizoram chu India ram pumah state fai ber parukna leh hmar­chhak state zinga fai ber dawttu a ni a; Aizawl district chu hmarchhak bialah district fai ber pahnihna a ni bawk.

Swachh Survekshan Grameen 2018-ah hian India rama state hrang hrangte chu zone parukah ṭhen a ni a, Mizoram chu North East Zone-ah a awm. State inelnaah Mizoram chuan point 87.17 hmuin, North East Zone bikah pahnihna a ni a, India ram pumah erawh chuan parukna a ni. Pakhatna chu Haryana state a ni.

District inelnaah Aizawl district chuan point 91.16 hmuin, NE Zone-ah pahnihna a ni a, India ram pumah erawh chuan 64-na a ni. District inelnaah hian Maharashtra-a Satara district chu pakhatna a ni thung.

Swachh Survekshan Grameen intihsiaka lawmmante chu October 2, Thawhlehni khan New Delhi-ah sem a ni a; Mizoram aiawhin PHE chief engineer HC Lalnunzira leh executive engineer Lalsanga ten an dawng a, nimin khan Aizawlah lo hawin, Lengpui Airport-ah an lo hmuak a ni.

Swachh Survekshan Grameen-ah hian India ramah state leh union territory 29-a district 685 chu August 2018 chhungin endik a ni a; endikna criteria-te chu - direct observation (30%), citizen feedback (35%) leh service level progress (35%)-te a ni.

PHE department hotute sawi danin, Swachh Survekshan Grameen-ah hian state angin inelna a san vak loh laiin, district anga inelna erawh a sang hle niin a sawi a; state-a pakhatna point hmuh aiin district-a 29-na point hmuh pawh a la sang zawk tih a sawi. "India ram pumah state anga an sàn loh viau laiin, state eng emaw zata district-te chu an ṭha em em a, kan tluk lo nasa hle a, ṭan kan lak a ngai tak meuh a ni," an ti.

Mizorama district-te chu direct observation (a hmuna endikna) leh service level progress (MIS entry)-ah an tih ṭhat viau laiin, citizen feedback-ah an hniam hle a, chu chu a pumpuia a hniam chhan leh, mipui ṭan rual tawk loh vang nia a lan thu an sawi bawk.

PHE department hotute sawi danin, cri­teria dangah Mizorama district-te'n full point deuhthaw an hmuh laiin, mipui feedback-ah chuan Mizoramin 69% leh Aizawl district-in 76% chauh an hmu a ni.