CM-in Lalsavunga Park a hawng

Hlimena rama Lalsavunga Park chu nimin khan chief minister Lal Thanhawla'n a hawng. CM chuan, ram changkang apiangah hmun thengthaw nuam leh hahchawlhna an ngaih pawimawh thu a sawi.

Chief Minister chuan, mihringte'n intihhlimna leh hahchawlhna an mamawh thu sawiin, "Ram changkang apiangah hmun thengthaw nuam hahchawlhna an ngai pawimawh a, an khawpui lûn berah pawh a khát tâwkin park an siam ṭhin. Vawiinah chutiang ang hmun hawn a ni hi a lawmawm hle a ni," a ti.

LAD-in Mizoram hmun hrang hranga ramngaw humhalh paha park nuam tak tak an siam tawh thu sawiin Lal Thanhawla chuan,"Ramngaw leh nungcha humhalh kawnga Mizote harh thar pawimawh. Kan khawvel chen tinuam zeltu tur a ni," a ti a; tuihna humhalh kawngah te, ram kâng ven kawngahte Mizote an harh chhuak zel chu lawmawm a tih thu a sawi.

LAD minister PC Lalthanliana pawhin thu sawiin, Lalsavunga Park siam puitlin a ni chu lawmawm a tih thu a sawi a, "He hmun hi nawmchenna tura siam a ni lo a, chên nawmna tura siam a ni. Park hi LAD thawh rah chauh ni loin, a tir aṭanga local council, department dangte leh mimal, khawtlang, kohhran leh tlawmngai pawlte atanga ram leh tha an thawh vanga puitling a ni," a ti.

Thusawitu dang bialtu MLA KS Thanga chuan a biala park thar hawn a ni chu lawmawm a tih thu sawiin, "Mi ramah chuan nungcha a tam avangin khualzinte hiptu leh tihlimtu a ni ber ṭhin a, keini ramah pawh nungcha hmuh tur kan neih ṭhin, ramngaw kan lo tih chereu avanga awm ta lo te kan koh kir theih nan hma la ila, tourism tihhmasawn nan a tul hle dawn a ni", a ti a, park chu a kal apiangten uluk leh thianghlim taka an vawn vek a beisei thu a sawi.

Lalsavunga Park hi kum 2014-ah siam ṭan a ni a, a siam nan cheng nuai 464.18 sen a ni. A tirah LAD budget-a sum dah hmanga bul ṭan niin, siam puitlin nan hian NEDP aṭanga sum hmuh hman a ni a; bigha 300 vela zau niin, a innghahna tlangdung sei zawng chu km. 1-a thui a ni.