Maxicab nuar MCU-in an dem

Mizoram Consumers' Union (MCU) chuan thuchhuah siamin, Mizoram Maxicab Owners Association (MMCOA)-in chuan man (rate) sang zawk phûta nawrh huaihawt a, mipui harsatna thlen zawnga an tlan lo chu pawi an tih thu leh an dem thu an tarlang. Consumer-te thlavâng hauh nan a ṭul dan azirin PIL thehluh thlenga hmalak an tum thu an puang.

MCU chuan, tuna maxicab, taxi, city bus, two wheeler taxi leh tree wheeler chuan man chu State Transport Authorioty (STA)-in March 29, 2018-a tihsan chauh a ni tih sawiin, chu chu a hmaa mi aiin 30-40% vela sang a nih thu an sawi a; "Mizoram hi hmun kilkhawr mah ni se, India rama oil man tlàwmna ber pawl a ni. Chuti chung chuan India rama motor chuan man tona ber a ni chunga sorkar (STA)-in ngun taka a ngaihtuaha rate a siam duh tâwk loa a aia sang an phût zel hi pawi kan ti tak zet a ni," an ti.

MCU chuan, Mizoram sorkar chu mipui thlavâng hauh a, sorkar dan siam palzûttute leh pawisa lo, mipui harsatna siam ṭhintute chunga action la turin an phût a; sorkar rate siam (metal-ah Rs. 2.50, unmetal-ah Rs. 2.70)-a tlan duh lo maxicab-te chu an permit tihtawpsak tur leh sorkar rate siam anga tlan duhute hnena permit pe mai turin an ngen a ni.

Two wheeler taxi rate (km. khatah Rs. 20 leh a bak km. khat zelah Rs. 10 zel) anga tlan lote chu DTO, STA, Traffic Police leh MCU-ahte report zel theih a nih thu sawiin MCU chuan, "Hetiang rate sokar siama tlan lo two wheeler-te chungah sorkar hian action la zel tawh se kan ti tak meuh a ni," an ti a; sorkar chu dan a siamte ngai pawimawh turin an phût.

MCU chuan, Mizo­ramah tute pawl/khua emawin an thil phût tih­hlawhtlin nan leh sorkar kar nan mirethei mipui vantlang tawrhna tura total bandh, road block leh thil dangte an ti chu ṭha lo an tih thu an sawi a, "A ṭul dan azirin MCU chuan PIL thehluh thlengin hmalak kan tum a ni," an ti.