Aizawl City Centre Annexe building tur Lungphùm Commerce Minister-in a phúm

Commerce & Industries minister H Rohluna chuan, nimin khan Aizawl New Market-ah Aizawl City Centre Annexe building sak tur lungphùm a phúm.

Aizawl City Centre Annexe building sak tur chu ei tur hrang hrang zawrhna kawnga thianghlim zawk leh fai zawka kalpuina atana hmalakna a nih thu sawiin H Rohluna chuan, "Mizoram mipuite hriselna leh thianghlimna kawnga hmasawnna a nih ngei ka beisei. ACC Annexe building sak tur hi kan ram hmasawnna leh kan hriselna atan pawh kan mamawh avangin building hlui ṭhiah kawngah te, dawr sawn a ngaih hunahte pawh rilru inhawng taka dawnsawn a pawimawh," a ti.

Aizawl City Centre Annexe building hi NEDP hnuaia sak tur a ni a, a sak nan cheng nuai 3641.59 dah a ni. A sakna tur hmun hi foreign lane, Land Revenue & Revenue department building hmang tela sak tur a ni. Building-ah hian quarters pariat, stall 100, dawr 108 leh lirthei 324 dah theihna tura siam tum a ni.