Bru chungchangah inremna anga Hma la turin ZPM-in sorkar phût

Zoram Peoples' Move­ment (ZPM) ṭhalaite chuan nimin khan thuchhuah siamin, Mizoram Bru raltlante chungchangah sorkar chu inremna siam ang leh an intiam tawh anga hma la turin an phût tih an tarlang.

ZPM ṭhalai chuan, Joint NGO leh Mizoram sorkarin inremna an lo siam tawh (Vide no. 32020/19/2012 HM Govt. of Mizoram Home Department Dated Aizawl the 8th April, 2014) angin, Bru-te Mizorama an lêtna turah Mizoram sorkar chu ngaihdan hran nei lo a, inremna anga kaltlang turin an ngen a, "Tuikukte hi Mizoram sorkar hian vote zawn nan ringawt hmang lo a, Zo fate himna leh nakina ṭhangthar lo la awm zel turte hmakhua ngaihtuah tawh zawk turin kan ngen a ni," an ti.

Luhlul chhuaha Mizorama lêt duh lote chu Mizoram Electoral Roll aṭanga paih ngei tura ziaka sorkar a lo intiam tawh pawh tihlawhtling tura ngenin ZPM ṭhalai chuan, "Hma la nghal thuai turin sorkar kan ngen. Mizote hlíng pâi ni chho reng tawh tur Tuikuk leh Chakma-te kan ramah mikhual an nihna hre lo a, huangtau taka siam a, ṭhangtharte chanvo chuh ngam khawpa khawi ngamtute hi Congress leh MNF party-te an ni," tiin, Congress leh MNF-te chu hnâwl tawh turin Mizoram mipui an ngen a ni.

ZPM ṭhalaite chuan Mizo mipui zawng zawngte chu ṭawngṭaina nen Mizoram tluchhhe mek tungding turin thawh­puiah an sáwm a ni.