Aizawlah Election e-Atlas Portal enchhin a ni

Directorate of Science & Technology conference room-ah nimin khan chief electoral officer (CEO) SB Shashank hoin Mizoram Election e-Atlas Portal (website) enchhin a ni.

CEO chuan, Geogra­phic Information System (GIS) hmanga Mizoram Remote Sensing App­li­cation Centre (MIRSAC) leh North Eastern Space Application Centre (NESAC) bultuma Mi­zoram Election e-Atlas Portal buatsaih a ni chu lawmawm a tih thu sawiin, "He website hmang hian felfai leh rang zawka inthlan buatsaih leh kalpui theih a nih ka ring," a ti a; a changtlun lehzualna tura rawtna hrang hrangte a sawi.

Aizawl DC Dr A Muthamma pawhin thu sawiin, inthlanna atana thil ṭangkai tak tur buatsaih a ni lawmawm a tih thu a sawi a, "Hei hian inthlan inbuatsaih leh inthlan ní atan kawng­ro thui tak a su ang. Inthlanna langtlang leh rintlak tak neih kawngah a puih ka ring," a ti.

MIRSAC scientist R Lalfamkima chuan, web portal an siam dan leh a hman dan tlangpui a sawifiah a, "Tunlai van­sang thiamna hmang ṭangkaiin Mizoram chhunga assembly consti­tuency tina polling station building zawng zawngte bakah, a kalpawh dan turte thlenga tihlan vek a ni," a ti a; web portal chuan inthlan hmaa inbuatsaih lâwk dan tur eng emaw chen a puih theih tur thu a sawi.

Inkhawma tarlan danin, Mizoram Election e-Atlas Portal (website) hi sorkar official tana hman tura duan a ni a, GIS-Base Web Portal a nih angin Mizorama polling station zawng zawngte awmna geogra­phical location (lat/long)-ah dah vek a ni. Mipa leh hmeichhia voter awm zat te, khawi constituency-a awm nge tihte leh information dang - polling station aṭanga damdawi-in hnai ber, police station hnai ber, petrol pump hnai ber te, mobile phone signal awm leh awm lohte dah a ni.