Kangmei Vên Hapta hman ṭan a ni ; Mi tin kan fimkhur a ngai - Chief Minister

Nimin khan Mizoram hmun hrang hrangah kangmei vên hapta, Fire Prevention Week hawn a ni a, Aizawlah chuan chief minister Zoramthanga'n Synod Conference Centre-ah a hawng. Chief Minister chuan, kângmei lakah mi tin an fimkhur a ngaih thu a sawi.

February 12, 2022 thleng awh tur Fire Prevention Week hawngtu CM Zoramthanga chuan, kângmeiin mi tam tak tan harsatna a thlen ṭhin avanga mi tin an fimkhur a ṭul thu sawiin, "Nikuma Mizoram chhim lama nasa taka kângmei chhuakin mi tam tak tan tawrhna a thlen a ni. Kângmei tam tak hi vên theih a nih avang leh kangmei laka invenhim hi kan ngaih pawimawh phawt chuan kan ram hi nasa takin hma kan sawn ang," a ti.

Khawvel hmun hrang hrangah kângmei nasa tak kum tin deuh thaw a chhuah ṭhin thu sawiin Zoramthanga chuan, "Mizorama kângmei chhuak tam tak hi vên theih thil a ni," a ti a; kângmei chhuak tam tak chu lo hâlna aṭanga chhuak a nih thu a sawi.

Chief Minister chuan, ram nghet neih a, agriculture, horticulture, forest plantation emaw siam chu eizawnna ṭha, economy chawi sangtu a nih bakah, ram kâng laka invènna ṭha tak pakhat a nih tur thu a sawi a, "Mei hi ṭangkai mah se, thunun loh chuan chhiatna nasa tak thlentu a nih avangin mi tin fimkhur a pawimawh," a ti.

Environment, Forest & Climate Change (EFCC) minister TJ Lalnuntluanga pawhin thu sawiin, "Forest Survey of India tarlan danin, Mizoram pum chhûtin 28.28% chu kângmei chhuah hlauhawm berna hmun a ni a, 49.73% chu kângmei chhuah hlauhawmna a ni," a ti a; kângmei chhuah hlauhawm lohna 2.2% chauh a awm thu a sawi.

Mizoram sorkarin kângmei ven a ngaih pawimawh thu sawiin EFCC Minister chuan, "January 31, 2000-a State Level Committee on Fire Prevention din a nih aṭangin ṭhahnem ngai taka hmalak a ni. District leh khaw tina kângmei ven kawnga hmalakna hriatpui nan leh intihphûr tawn nan kum tin state level leh district level lawmman buatsaih ṭhin a ni," a ti.

Inkhawma tarlan danin, sorkar laipuiin ramngaw kâng tur ven nan Forest Fire Preven­tion & Management Scheme a nei a, kum tin Mizoram hnenah cheng nuai 100 a pe ṭhin. Pawisa chu ram pum leh district level committee-ah sorkar ramngaw chauh ni loin, vantlang ram vên nan pawh hman ṭhin a ni.

Kum 2021 khan district tinte'n fire lines an siam bakah, fire watcher ruaiin kângmei vênnaah ṭan an la a; chutih rualin, ruahtui a tlak tlem avangin kum dang aiin ram kâng a nasa a, chhim lamah phei chuan an tuar nasa zual a ni.