Fire hydrant bula lirthei dah khap

Traffic SP Rodingliana Chawngthu chuan nimin khan thupek chhuahin, Aizawla kangṭhelh motor tui chawina tura siam, fire hydrant dahna hmun aṭanga metre 5 huam chhungah lirthei dah/hûn phal a nih loh thu a puang.

Thupek hi kângmei a chhuah palha chhan­chhuahna hna leh kâng ṭhelhna atana hman tur tui awlsam zawka lak zung zung a nih theihna tura tihchhuah a ni a; Aizawla hmun 41-a fire hydrant awm mek bula lirthei dah phal loh hian chhun leh zan a huam vek a ni.

Traffic SP thupek hi vawiin aṭanga hman tur a ni a, thu leh awm hma chu hman a ni ang. Thupek zâwm lote chu MV Act, 1988 hmanga hrem theih an ni.

Fire hydrant hi PHE department-in PHE changtu minister Zodin­tluanga Ralte hmalaknain kum 2016 August thla aṭangin Aizawlah dah/bun hna ṭan a ni a, January 31, 2017 khan hawn a ni.

Hawnna inkhawmah hian tui lâkna tur pipe (hose pipe) pawh Aizawla YMA branch hrang hrang hnenah hlan nghal a ni a; hose pipe chu metre 15-a sei, metre 75 thlenga zawm sei theih niin, YMA branch-te hnenah panga ṭheuh pek a ni.

A tira ruahman dan chuan, Aizawla hmun 400-ah fire hydrant bun tur a ni a, January 31, 2017-a hawn a nih lai hian hmun 65-ah bun a ni tawh. Traffic SP-in fire hydrant bula lirthei dah phal loh thupek a chhuah­ah hian hmun 41 chiah tarlan a ni thung.

Aizawla fire hydrant awmnate
1. Zemabawk North Presbyterian biak-in bul
2. Ṭhuampui taxi stand, helipad hnuai
3. Durtlang Presbyterian biak-in bul
4. Leitan, Willow Mount School bul
5. Bawngkawn (Durtlang panna kawng)
6. Lalsangliana Petrol Pump bul
7. Chaltlang Dawrkawn
8. Ramhlun South city bus stand bul
9. Aizawl Venglai, Zirtiri College bul
10. Ramthar Veng, PC Lalzuiliana in bul
11. Ramhlun North bazar bul
12. Chanmari West, UPC biak-in bul
13. Zarkawt, Zalawma in bul
14. Dawrpui, Prison Office bul
15. Electric Veng, Power House hlui bul
16. Armed Veng, 1st MAP gate-1 bul
17. Bethlehem Vengthlang taxi stand bul
18. College Veng, field bul
19. Raj Bhavan chhim lam gate bul
20. Republic Veng, Presbyterian biak-in bul
21. Republic Veng, Pi Pangi Péng bul
22. ITI Veng kâwn
23. Venghnuai Field sir, Republic Veng road
24. Mualpui Zero Point, World Bank road
25. Kulikawn, Thakthing Veng péng
26. Sikulpuikawn, Mission Veng, SBI bul
27. Mission Vengthlang, Rev. Lalsawta in bul
28. Saikhamakawn, CP Road péng
29. Bungkawn, Maubawk kawng
30. Khatla Fire Station bul
31. New Secretariat Complex, záwl zau lai sirah
32. Tuikual A Mual, Mizo Hnam Rûn bul
33. Tuikual B Mual, Tuichhunchhuah bul
34. Vaivakawn, R Romawia in bul
35. Vaivakawn city bus Stand, Luangmual péng
36. Zotlang, Lalrosiama in bul
37. Chawnpui, Adventist Hospital hnuai
38. Zonuam, Lalhruaia in bul
39. Ropaiabawk, Solomona Temple bul
40. Govt Complex, PHE tanky bul
41. Central Jail Veng, Nunsanga in bul