Mizoram CM leh smuggler zanriah kil duna puhnaah Mizoram Chief Minister Office an insawifiah

Assam chanchinbu Barak Bulletin chuan Mizoram chief minister Zoramthanga chu kuhva tawlh rutu nia puh Abu Mazumdar nen zanriah kilhoah puhin a thlalak nen February 5, 2022 khan an chhuah a, he thil hi Chief Minister's Office (CMO) chuan nimin khan an sawifiah.

Barrak Bulletin tarlan danin, Zoramthanga'n zanriah a buatsaihah Assam chief minister Himanta Biswa Sarma leh mi pawimawhte bakah kuhva tawlhrutu Abu Mazumdar hi a tel a, Abu Mazumdar hi Zoramthanga mikhual niin an ziak.

Hetihlai hian CMO chuan thuchhuah siamin, chief minister Zoramthanga leh Assam chief minister Himanta Biswa Sarma ten November 25, 2021 zana Delhi-a zanriah an kîlho thu tarlanah thu dik tâwk lo a awm thu tarlangin, "Zanriah hi Mizoram CM-in a buatsaih anga ziah a nih laiin, Assam CM-in a buatsaih a ni zawk a, ani sàwmna angin Delhi Assam House-ah zanriah hi Mizoram CM hian a va kîlpui a ni," a ti.

CM Zoramthanga chu Delhi Mizoram House Resident Commissioner, OSD to CM leh Addl. PS to CM-te'n an ṭawiawm a, anni bak chu ṭawiawmtu an awm loh thu CMO chuan a tarlang a; tun hnaia Assam Police-in kuhva tawlhruk chungchanga an man Abu Mazumdar-a chu Mizoram Chief Minister sawm a nih loh thu leh Assam CM-in a sawmna anga tel a nih a rinawm thu an tarlang bawk.

Barak Bulletin chuan Abu Mazumdar hi Mizoram sorkar nena inhnim hnai tak angin an ziak a, Chief Minister level meeting-ah pawh Mizoram Chief Minister sawmna anga tel ve niin an tarlang.

Cachar Police-te chuan tun hnai khan Myanmar aṭanga kuhva tawlhrukna thila inhnamhnawihna lian tak neia an sawi Abu Mazumdar-a in hi Silchar-a Itkhola hmunah an dap a; Abu Mazumdar-a naute zinga mi Hazi Nizam Uddin chu police-te'n an kah hliam hnuah man a ni a, Abu pawh hi an la zawng mek niin Barak Bulletin chuan an tarlang.