Mizoram Lokayukta din hnuah Eiruk thubuai 38 an ziak lut tawh

Mizoram Lokayukta chairman tur March 11, 2019-a lak luh a nih hnuah Lokayukta hian eiruk thubuai 38 an ziak lut tawh a, chu'ng zinga 11 chu tihtawp a ni tawh.

Eiruk thubuai ziah luh 38 zingah hian pathum chu preliminary inquiry kalpui loa tihtawp a ni a, a dang pariat chu preli­minary inquiry neih a nih hnuah tihtawp a ni thung. Thubuai 35 chu Lokayukta hian thubuai chhuitu tur (investigation wing) an neih loh avangin investigating agency ACB/CBI hnenah preliminary inquiry ti turin an thawn a ni.

Lokayukta chuan investigating agency-te aṭangin thubuai 19 chhui chianna report an dawng tawh a, thubuai chhui chian mek 16 a awm. Thubuai 10-ah preliminary hearing tih turin hriattirna (notice) chhuah a ni tawh a, hearing neih a nih hnu­ah thubuai pahnih chu tihtawp a ni. Thubuai pasarih chu hearing neih a nih hnuah chhui zui zel tura tih a ni a, regular investigation tih mek a ni.

Vigilance department changtu chief minister Zoramthanga chuan, eirûk thubuai chhui tura din Mizoram Lokayukta tan investigation wing hranpa din ngei an tum thu March 9, 2021 khan Assembly House a lo hrilh tawh.

Lokayukta hian eiruk thubuaiah complaint an dawnin an zir chian hnuah chhui zui tlaka an ngaihte chu ACB emaw, CBI emaw hnenah chhui chiang turin an thawn ṭhin a; CBI-in an chhui dawn chuan state sorkarin phalna an pek a ngai.

Mizoram Lokayukta hian ACB tana chhui chian buaithlak deuh tura an ngaih thubuai pahnih chu CBI chhui atan an thawn tawh a, mahse, Mizoram sorkarin CBI chu chhui phalna a pe lo nia thu dawn a ni.