Kawlphetha man tihsan rawtnaah ziaka sawiselna thehluh a la awm lo
Mizoram sorkarin Mizoram leh Manipur-a kawlphetha hman man (power tariff) bithliahtu, Joint Electricity Regulatory Commission for Mizoram and Manipur (JERC)-ah kum 2022-23 atan kawlphetha hman man ennawn a, tihsan a rawt chungchangah sawiselna ziaka JERC-a thehluh a la awm lo.
January 28, 2022 khan Power & Electricity department chuan kawlphetha hman man tihsan an rawt thu leh sawiselna leh rawtna JERC-a thehlut duh tan February 20, 2022 thleng hun hawn a nih thu an tarlang. Sawiselna leh rawtna thlentute'n hmaichhanah an duh angte an sawina hun (public hearing) buatsaih leh tur a ni a, chutah chuan Power & Electricty department-in an duh dante an sawi ve ṭhin bawk.
Vanglaini palai zawhna chhangin JERC hotute chuan, Mizoram sorkarin kawlphetha man tihsan a rawt chungchangah ziaka sawiselna an la dawn loh thu an sawi a, "Ṭawngkaa sawiselna chu danah chuan thutling a ni lo. Chuvangin, sawiselna emaw, rawtna emaw nei duhte chuan ziak ngeia an thehluh a ngai," an ti.
Tarlan tawh angin, Mizoram sorkar chuan kawlphetha man 21.05%-a tihsan a rawt a ni. Mizoram sorkarin rawtna a siam anga power tariff tihsan a nih chuan, sorkarin a subsidise hnuah chawhrualin power unit khat man Rs. 8.80 a ni dawn a, tariff hman mekah chuan power unit khat man Rs. 6.71 a ni.
Sorkar kum kal mek (2021-22) power tariff atan Mizoram sorkar chuan nikum (2021) khan 41.92%-a tihsan a lo rawt tawh a, mahse, JERC chuan Mizoram sorkar rawtna chu pawm loin, 20.68%-in a tisang a ni.
Power & Electricity department chuan electric hman man, tariff thar tura rawt aṭanga sum hmuh belhin department-in revenue a hmuh tur zat a hmuh tlin loh ṭhinna a tihziaawm beisei a nih thu hriattirna an tih chhuahah an tarlang a, "Electric hman man tuna rawtna anga tihpun a nih chuan rate hman mek lai aiin cheng vbc. 75.83 hmuh belh tura chhût a ni," an ti.