District-ah Fire Prevention Week ṭan a ni

Kângmei vên hapta, Fire Prevention Week chu nimin khan district hrang hrangah hawn a ni a, kal khawmte'n kângmei vêng turin thutiam an sawi rual.

Lungleiah chuan Lunglei Convention Centre-ah bawrhsap Kulothungan A-in kângmei vên hapta a hawng. DC chuan, Mizoram chu India hmarchhak state zinga ramngaw awm ṭhatna hmun leh Lunglei district chu Mamit district tih loha ramngaw nei ṭha ber district a nih thu a sawi a, "Ram tikâng lo turin Forest department chauh an tâwk lo a, mi zawng zawngin mawhphurhna kan nei tih i hre thar ang u," a ti.

Lunglei district-ah hian kum 2019 khan hmun 187-ah ram a kâng a, kum 2020-ah hmun 237 leh kum 2021-ah hmun 407-ah ram a kang bawk. Ram kang zawng zawng zau zawng chu hectre 4,365 a ni.

Champhaiah chuan MJA Press Club-ah bawrhsap Maria CT Zuali'n a hawng. Bawrhsap chuan, Champhai district-a ram ngaw cherêu nasa lutuk leh nikuma kângmei chhuak vanga ram kâng chu pawi a tih thu sawiin, "Lo hâl vanga ram kâng tih loh kângmei chhuak thei dangte titlém tura nasa lehzuala ṭan lak a ṭul tak zet," a ti.

Champhai district-ah kângmei vangin kum 2019 khan ram sq.km. 115.21-a zau leh kum 2021 khan sq.km. 113.90-a zau ram hring hloh a ni.

Kângmei ven hapta hi Kolasib-ah chuan Parish Hall-ah MLA K Laldawngliana'n a hawng a; MLA chuan, "Ram kalsiam hna leh sorkar hmalakna eng pawh hi a hlawhtlinna chu mipui ṭanrualna leh thawhhonaah a innghat," tiin, kângmei ven kawnga ṭang rual turin mipui a ngen.

Kolasib district-ah hian kum 2021 khan ram hectare 307.41-a zau hmun 352-ah lo/leipui/huan leh thil dang hâl a awm a, hmun pakuaah ram kang, hectare 16.3-a zau a awm bawk.

Serchhip DC Nazuk Kumar chuan DC conference hall-ah kângmei ven hapta a hawng a, "Tlawmngai pawlte inpekna avangin Mizoramin thil ṭha tam tak a nei tawh a, khaw tina tlawmngai pawlte tun aṭanga inbuatsaihin, kângmei ven kawnga mahni zâwnah theihtawp lo chhuah zel ang che u," a ti.

Lawngtlaiah chuan DC pisa tualah Lai Autonomous District Council-a chief executive member V Zirsanga'n a hawng a, "Mi pakhat thil ṭha tihin rah duhawm tak a chhuah thei," tiin, kângmei ven chu mi tin mawhphurhna a ni tih hre chunga ṭang tlang turin mipui a sáwm.

November 2020 - May 2021 chhung khan Lawngtlai district-ah lo/huan hâl 611 awmin, hectare 313.59-a zau a ni a, ramngawa kângmei chhuak hectare 17-a zau a awm bawk.