Ráltlânte chhawmdawlnaa kut sil tumah ZPM ṭhalaite'n sorkar an puh

ZPM Ṭhalai chuan, Myanmar buaina avanga sahimna zawnga Mizorama tlân lutte chhawmdawl hnathawk turin Mizoram sorkarin local/village level committee a din tih tarlangin, Myanmar ráltlânte chhawmdawlna kawnga sorkarin kut sil a tumna nia an ngaih thu an tarlang.

ZPM ṭhalaite chuan thuchuah siamin, hripui leh lockdown vanga harsatna tawkte chhawmdawlnaah MNF kaihhruai Mizoram sorkarin kut silin, task force-te kuta chhawmdawl hna a papêk tawh tih an tarlang a, "Burma aṭanga kan unau ráltlânte chhawmdawlna kawngah sorkarin a kut silin, chhawmdawlna hna thawk turin Village/Local Level Committee on Myanmar Refugees a din ta mai hi hriatthiam harsa kan ti a, mipui harsatnate mahni mawha la ngam lo sorkar kan nei hi a vanduaithlâk hle a ni," an ti.

ZPM Ṭhalai chuan, "Mipuite'n harsatna kan tawhin kan aiawha kan thlan sorkarin a kut sil a, kan harsatnate keimahni leh keimahni inchingfel tura mipuite hnena min bel leh ngawt mai ṭhin hian MNF sorkar chu mipui huapzo sorkar a nih lohzia a tarlang chiang hle a ni," an ti a; Myanmar ráltlânte sahimna, ei leh in leh an mamawh pekte chu hnam party awmchhun inti MNF sorkar mawh a nih thu an sawi bawk.