Sorkar hmasate'n policy an kalpui tawh aiin SEDP-in a huam zau - HTE Minister

SEDP hnuaia Higher & Tehnical Education Board chu nimin khan an chairman Dr R Lalthangliana, Higher & Tehnical Education (HTE) minister hoin Secretariat conference hall-ah an ṭhu a; Minister chuan, sorkar hmasate'n hmasawnna policy an kalpui tawh ṭhin aiin SEDP-in a huam zau tih a sawi.

Ṭhutkhawmah hian zirna sang zawk tihhmasawn nana hmalak dan tur sawiho a ni a; college hrang hranga skill development course kalpui theih dan te, college-a zirtirtu indaih lohna phuhrûkna tura hmalak dan te, college ṭhenkhata post graduate zirna hawn a nih theih dan kawng zawn te, college library tihchangtlun chungchang te, B.Ed. zirna hawn belh dan turte an sawi a ni.

Dr R Lalthangliana chuan, sorkar hmasate'n hmasawnna policy an kalpui tawh ṭhin aiin SEDP-in a huam zau zawk nia sawiin, "SEDP ruahmanna hnuaiah hian thil tam tak lengin a awm a, sorkar rorelna leh inawpna kalpui dan thlengin a huam avangin board hrang hrang kalpui dan pawh a inang thei lo," a ti.

R Lalthangliana chuan, sorkar budget tibuai loa hmun dang aṭanga sum ruahmanna leh tih dan ngaihtuah chu a pawimawh thu a sawi bawk.

HTE secretary Esther Lalruatkimi pawhin thu sawiin, zirna chungchanga hmalakin zirna a nghawng dan teh nan hun a duh rei thu leh HTE Board hnuaia hmalakna tur duannaah zirlaite'n an hlâwkpui leh ṭangkaipui theih ang chi ngaih pawimawh hmasak a ṭul thu a sawi.

Ṭhutkhawmah hian HTE Board member-te bakah, Mizoram University Registrar, College Development Council Director leh Mizoram College Teachers’ Association aiawhte an tel a ni.