CM Zorama puhna MNF-in an sawifiah

MNF party chuan, chief minister Zoramthanga leh Assam chief minister Himanta Biswa Sarma te November 25, 2021-a Assam House, New Delhi-a zanriah an kîl dun chungchangah CM Zoramthanga chu puh hmingchhiat tum a nia sawiin, an puhna chu dâwt a nih thu an tarlang.

Delhi Assam House-a CM Zoramthanga leh Assam CM Himanta Biswa Sarma ten anmahni ṭawiawmtu ve vete nen zanriah an kîlho chungchangah Zoramthanga chu a tih loh pui ti angin nimin khan Aizawla chanchinbu pakhatah chhuah a nih thu leh ZPM PAC member TBC Lalvenchhunga'n social media-ah thu a vawrh darh thu MNF chuan thuchhuah siamin an tarlang a ni.

Delhi-a zanriah an kîlho chu Zoramthanga buatsaih anga tarlan a nia sawiin MNF chuan, "Hei hi a dik lo a, Assam CM Himanta Biswa Sarma-in Assam House, New Delhi-a a buatsaih zawk a ni a, Pu Zoramthanga hi zanriah kîl turin Assam CM hian a sáwm zawk a ni," an ti.

MNF chuan, zanriah kîlhonaa CM Zoramthanga ṭawiawmtu zingah Assam police-te'n kuhva tawlh ru ṭhina an rinhlelh mek Abu Mazumdar a tel anga thu vawrh darh chu dâwt a nih thu sawiin, "Assam CM hian amah ṭawiawm turin minster Atul Bora leh Abu Mazumdar te hi a sáwm zawk a ni. Abu Majumdar hian Assam CM hi Delhi a thlen khalh a, Mizoram House-ah Pu Zoramthanga leh a ṭawiawmtute hi va hmu hmasain, anni chuan Assam House-a thleng turin an lo kawhhmuh a ni," an ti a, Majumdar chu Assam House-ah Atul Bora nen an thlen dun thu an sawi.

Zanriah kîlhonaah Abu Majumdar chu a tìr lamah a lut ve mai lo nia sawiin MNF chuan, "Assam CM hnenah 'I sàwm a ni lo'm ni, páwnah a awm' an tih tâkah chauh Assam CM hian a koh luhtir tih hriat a ni," an ti a; CM Zoramthanga ṭawiawmtute hi OSD to CM Rosangzuala, additional PS to CM Peter Sawmpuia leh Delhi Mizoram House resident commissioner Amjad Tak te an nih thu an tarlang.

MNF chuan, thu belhchian dâwl lo leh dâwt hmanga CM Zoramthanga beihna social media-a vawrh darh leh chanchinbua chhuah a ni chu an hrethiam thei lo tih sawiin, "Thu an vawrh darh dawn a nih chuan a nihna chian hmasa phawta puanzar chauh ni ṭhin se ṭha tur a ni. Finfiah si loa awmhmun aṭanga thu dawn ang ang mipui hriata vawrh darh kan chíng ṭhin hi i sim tawh ang u," an ti.