KHAWTHLIR

Thisen pe
KṬP, Phunchawng Branch chuan an din champha vawi 24-na pualin nimin khan an kohhran hall-ah Synod Hospital tan thisen unit 18 an pe a, petute mipa 15 leh hmeichhia pathum an ni.

Tlân dan tidanglam
74 Road Construction Coy (GREF)-in Kawnpui-Durtlang-Aizawl kawng an thawm ṭha mek. Tluang taka hna thawh a nih theih nan February 5, 2022 aṭanga kawng siam chhung zawnga hman turin Aizawl SP C Lalruaia chuan lirthei tlân dan tihdanglam a nih thu a puang. Sihphir lam aṭanga Aizawl lam pan a tlante chu Zuangtui-Ṭhuampui kawngah tlan tur a ni a, Bawngkawn aṭanga Durtlang lam pante chu kawngpui pangngaiah tlan theih a ni.

Lunglei district-ah Red zone puang
Lunglei bawrhsap Kulothungan A chuan Lunglei district-a khua leh veng 13 chu Covid-19 hluarna, red zone-ah a puang. Red zone puan hian February 5-12, 2022 chhung a huam ang. Bawrhsap chuan red zone-a inkaihhruaina tur a tichhuak nghal a, thupek bawhchhiate chu Disaster Management Act, 2005 leh IPC Section 188 hmanga hrem theih an ni.

CTP-in RT-PCR Bunna tur tlawh
Champhai Ṭhalai Pawl (CṬP) chuan tun hnai khan Champhai District Hospital-a RT-PCR khawl bunna tura ruahman an tlawh a, hna thawh dan an enfiah. CṬP chuan, RT-PCR khawl châwm tura kum 8 chuang rin tawh electric wiring rin tum a ni chu ṭha lo an tih thu sawiin, "Eng pekna atan ringawt chuan electric wiring awm sa hi rintlak mah se, kháwl ṭha tak tak châwm tur chuan a rintlak lohin kan hria," an ti a, ceiling awm sa rin nghal tum pawh a him loa an ngaih thu an sawi bawk.

CYMA pe
Thangridema (L) leh Kawltukhuma (L) tu leh fate chuan nimin khan Central YMA pisaa hman turin sound system eng emaw zat an pe. Thilpek dawngtu CYMA assistant secretary Prof. Malsawmliana chuan, ram hruaitu hlun mual liam tate hriatrengna tur thilpek an dawng chu ropui an tih thu a sawi.