Mamawh loa mi 973 chhawr hrethiam lo

Peoples' Conference (PC) party chuan thuchhuah siamin, Mizoram sorkarin Power & Electricity department-ah thawktu mamawh aia tam mi 973 a chhawr avanga mipui electric bill a pun phah chu hriatthiam harsa an tih thu an tarlang.

PC party tarlan danin, sorkarin PE department-a thawktu mamawh zat a siam (sanction post) chu 2,140 a nih laiin, thawktu mi 2,958 an awm a, mamawh loh mi 808 chhawr an ni. Diesel/gas aṭanga kawlphetha siam chhuah a awm loh laiin a buaipuitu tur mi 165 an awm bawk a; mi 808-te nen ṭul loa PE department-a rawih zat chu mi 973 an ni.

PC party chuan, "Ṭul miah lo leh mamawh miah loa rawih mi 973-te thla tin hlawh chu mipui bill tling khawm aṭanga pek a nih avanga kan thla tin electric bill pung zelin mipui phurrit min belhchhah tam tial tial tih hria a, a rang thei ang bera inenfiah turin PE minister Pu R Lalzirliana kan phût," an ti.