Aizawlah Media Workshop buatsaih a ni ; Private hospital-te'n PMJAY zawm duh lo

Press Information Bureau (PIB), Aizawl chuan nimin khan Aijal Club-ah Media Workshop an buatsaih a, Aizawl DC Dr A Muthamma khuallian niin, IPR director David L Thangliana special guest a ni. Workshop-ah Mizoram State Health Care Society (MSHCS) chief excutive officer (CEO) Dr Biakthansangi chuan, Ayushman Bharat - Pradhan Mantri Jan Arogya Yojna (PMJAY) chu Mizorama private hospital-te'n an zawm ve duh loh thu a sawi.

Dr A Muthamma chuan, media-a thu puanzarte chuan a awmnaa khawtlang nun leh khawsak phung, a mi chengte rilru sûkthlêk leh dinhmun a lan chhuahtir tih sawiin, "Mizoram media-te thu ziah leh sawiah a ṭha zawnga thil thlirna hmuh tur tam tak a awm hi thil lawmawm tak a ni," a ti. India ram hmun dang nena khaikhinin Mizoram chu mihring nunhona leh khawtlang nunphung a la ṭha hle tih sawiin, "Inpumkhatna leh inunauna kan nei a, mipui mimirin dan pawh kan zâwm tha hle a ni," a ti.

Aizawl Bawrhsap chuan, Mizoramin harsatna nasa tak khawtlang anga a tawh chu - damdawi hmansual leh HIV/AIDS darh chak lutuk a nih thu sawiin, "Drugs leh HIV/AIDS hi theihtawp chhuaha do let a ngai. Mihring rilru put hmang a ṭha zawnga kaihhruai thei turin media-te an pawimawh," a ti a; Mizo khawtlang nun tichhe mektu ruih theih thilte leh HIV darh zel tur venna kawngah nasa leh zuala ṭan la turin journalist-te a fuih.

IPR director David L Thangliana chuan, print media leh electronic media-te thu chhuahte chu mipuiin an ngai pawimawh bik tih sawiin, "Rintlak leh belhchian dâwl nia mipuiin an ngaih ṭhin avangin mipui ei tur an ziah leh tihchhuahah fimkhur reng a ngai a ni," a ti a; Mizoramin inthlanpui a hmachhawn mai dawn atawh avangin media-te an pawimawhna lehzual dawn a, chuvangin, thu belhchian dâwl, rintlak leh finfiahna awm ngei chhuah ṭhin turin media-te a chah.

Media Workshop hawnnaah hian PIB, Aizawla assistant director Shariq Noor-a'n kal khawmte lawmna thu a sawi a; interactive session-ah 'Role and impact of print media in Mizoram' tih te, 'New media in Mizoram' tih te, Ayushman Bharat te, 'Social media and security concern' tih leh, 'Present media scenario in Mizoram' tih thupuite sawi leh ngaihthlak a ni. Zawhna leh chhanna hun hman nghal a ni.

Ayushman Bharat chungchang sawitu Dr Biakthansangi chuan, October 1, 2018-a India ram puma kalpui ṭan health care scheme thar, PMJAY chu Mizorama private hospital-te'n an zawm ve duh loh thu sawiin, "A chhan chu PMJAY-ah hian inenkawl man cashless (pawisa pek ngai lo) vek tur a nih vang a ni," a ti.

Dr Biakthansangi chuan, PMJAY scheme-a rate-te chu Mizorama private hospital-te'n a hniam lutuka an ngaih thu leh chuvang chuan PMJAY zawm an hreh pha thu a sawi a, "Private hospital-te hian anmahni'n surgeon an nei meuh lo a, sorkar doctor-te an ring a. Surgeon-te rate a san avangin PMJAY hi tlin loah an inngai a ni," a ti a; chutih laiin, Mizoram páwna Mizoram sorkar empanel private hospital ṭhenkhat chuan PMJAY an zawm dawn thu a sawi.