Khaw 3-ah Treasury dah dawn

Finance secretary Lalnunmawia Chuaungo chuan nimin khan Saitual, Hnahthial leh Khawzawla Treasury Office dahna tur notification a tichhuak.

Notification-a tarlan danin, September 29, 2018-a Council of Mi­nisters ṭhukhawmin an duh dan angin, Governor chuan khaw pathum - Khawzawl, Saitual leh Hnahthialah Treasury Office hawn a remti a ni. Khaw pathumah hian Treasury Office-te chu sorkar kum thar aṭangin a function dawn.

Treasury Office tharte'n Drawing and Disbursing Officer (DDO) a huam chin tur chu notification hrana tihchhuah leh tura tih a ni a; Treasury hawnna khaw pathumte hi MNF sorkar lai, kum 2008-a district headquarters atana puan tawhte a ni.

Tarlan tawh ṭhin angin, heng khaw pathum­te hian MNF-in an sorkar laia district atana an khua a lo puan tawh chu tihpuitlin an phut a, kawng hrang hrangin sorkar pawh an lo nawr tawh a ni.