Kuminah cyber crime case 6 ziak lut tawh

Mizoram Police chuan kum­inah January aṭanga August thla tawp thleng khan cyber crime kaihhnawihah thubuai paruk an ziak lut a; Mizoramah kum 2009 aṭangin cyber crime chungchangah thubuai ziah luh ṭan a ni.

PIB-in nimina Aijal Club-a Media Workshop an buatsaiha 'Social media and security concern' tih thupui sawitu PC Lalchunglura, additional SP (Crime) chuan, Mizoramah kum 2009-a cyber crime register ṭan a nih aṭanga August 2018 thlengin Police-te'n cyber crime case 89 an ziak lut tawh tih a sawi.

Mizorama cyber crime case ziah luh tawh dan chu - kum 2009-ah pahnih, kum 2010-ah pathum, kum 2011-ah panga, kum 2012-ah pali, kum 2013-ah pakua, kum 2014-ah 25, kum 2015-ah 10, kum 2016-ah 16, kum 2017-ah pakua leh kum 2018-ah paruk a ni.

PC Lalchunglura chuan, kum 10 (2009-2018) chhunga Mizoram Police-in cyber crime case an register zat hi 89 chiah ni mah se, report/complaint lut erawh a tam hle tih a sawi a, "Mipuite'n social media kaltlanga inbumna, harsatna kan tawh tam tak hi Police-a report loh leh case register loh a tam zawk a ni a. Sualna dang anga awlsam taka Police-a report remchang lo leh chhui chhuah theih loh tam tak a awm a ni," a ti.

Mizorama cyber crime/inbumna tam ber chu sum lama inbumna kaihhnawih, ATM card leh bank account kaihhnawih a nih thu sawiin Lalchunglura chuan, "Hemi chungchanga buaina leh harsatna tawk hi kum tin mi 100 chuang fê an awm rin a ni," a ti a; Mizo zingah bank account hralh mi eng emaw zat an awm thu leh buaina an neih phah thu sawiin, bank account-te hralh lo turin Mizo mipui a chah.

PC Lalchunglura sawi danin, tun hnai khan Jaipur, Rajasthan-a DSP pakhatin Mizoram Police-ah lehkha a rawn thawn a; chutah chuan, vai mipa mi pakhatin vai vek hmeichhe pakhat a bum a, hmeichhia chu bank account hrang hrangah cheng nuai 10 a thuntir a ni. Hmei­chhiain complaint a thehluh hnuah police-in an chhui a; hmei­chhiain pawisa a dah luhna bank account zinga pathum neitu chu Mizo (ITI Veng Mualpui Road, Tuikual South leh Kulikawn-a mite) an ni. Mizo pathumte hian an bank account chu mi hnenah an hralh a ni.