College zirtirtute'n inkhawmpui an nei

Mizoram College Teachers Association (MCTA) nimin khan Saitual College auditorium-ah Annual General Conference vawi 40-na an hmang a; Mizoram sorkara a ngheta thawk college zirtirtu ṭhahnem tak an tel.

MCTA conference-ah hian Saitual College principal Dr Lalsiamhnuna'n inlawmna thu a sawi a; "Zirtirtute hna hi Pathian rawngbawlna pawimawh tak a ni a, Pathian ṭihna nena hna kan thawh ṭheuh a ṭul. Ram siamṭhat hna kan kutah a awm tih hria ila, ram leh hnam tana ṭha tur ngaituahna tak tak séngin, ram hruaitu kan thlan thiam a pawimawh tak zet a ni," tiin college zirtirtute a chah.

MCTA Annual Conference chawhma lam inkhawm chu MCTA vice president Lalbiakzuala'n a kaihruai a, MCTA president Dr PL Ramliana'n member-te lawmna thu a sawi. An member thi mi pathum sûnna hun hman a ni. Chawhnu lamah chuan rorel inkhawm neih a ni thung.

MCTA hi September 7, 1979-a din a ni a, tunah hian college hrang hrang / branch 23-an awm mek. An chhinchhiah danin, Mizoram sorkar college-ah zirtirtu 625 an awm a, assistant professor 186, associate professor 421 leh professor 18 an ni. College zirtirtu hna hnawhkhah loh 159 a awm mek a; contract leh part time lecturer 213 leh CSS hnuaia thawk mi 13 an awm bawk.