Mizoram Science Congress 2018 buatsaih

Mizoram Science, Technology and Innovation Council (MISTIC) leh science lam buaipuitu pawl pasarih ṭangkawp chuan nimin khan Pachhunga University College (PUC) Multipurpose Audotorium-ah Mizoram Science Congress 2018 an buatsaih a, Governor Kummanam Rajasekharan-a'n hmanpui.

Governor chuan, science leh technology chu ni tin nuna thil pawimawh tak, mipuiin an mamawhte an neih theih nan leh khawsak phunga harsatna hrang hrangte sukiang thei tura pawimawh a nih thu a sawi a, "Science leh technology lama ram changkang apiangte chu ram hausa an ni a, technology lama an thiamna chuan a dah chungnung bik a ni," a ti.

Mizoramin socio-economic development kawngah ziak leh chhiara a san avangin ram dangte a lehpêl thei tih sawiin Larsap chuan, "Chutiang tihlawhlting tur chuan zirtirna ṭha, a bik takin science leh technology lama zirtirna ṭha a pawimawh hmasa a ni," a ti a; eco-tourism, horticulture, forestry leh thing leh mau humhalhte chu Mizoram hmasawn theihna nia a hriat thu a sawi.

Chief scientific officer Dr RK Lallianthanga pawhin thu sawiin, "Science Congress hi discipline hrang hrang aṭanga scientist rual, zirlaite leh science lama tui mite tana intawhkhawmna remchang a ni. Mizoram Science Congress hian Mizoram chhunga science inzirtirna leh research lamah harh tharna a thlen ka beisei," a ti.

Prof. MRN Murthy, Indian Institute of Science (IISc), Bangalore chuan, kumina Mizoram Science Congress thupui, 'Perspective and trends in the development of science education and research' tih a sawi.

Mizoram Science Congress 2018-ah hian parallel technical session ṭum li buatsaih a ni a, abstract paper 110 thehluh a ni. Science model 24 pholan a ni bawk.