Ran chhiarpui neih tur atan inbuatsaih Mizoramah ran 49,24,542 chhinchhiah

India ramah ran chhiar­pui vawi 20-na (20th. Livestock Census 2018) neih a ni dawn hnai a; chhiarpui atana inbuatsaih nan AH&Vety department chuan nimin khan Vety Polychlinic Hospital conference hall-ah 'Master Trainers Training' an buatsaih. He hunah hian ran chhiarpui hnu­hnung ber, 19th. Livestock Census 2012 ang chuan, Mizoramah bawng, láwi, sial, beram, kèl, vawk, sakawr, ui, sazupui, sai leh ár 49,24,542 a awm tih tarlan a ni.

Training hi AH&Vety additional director Dr RC Lalmuana'n a kaihruai a; AH&Vety director Dr Hmarkunga chuan, sorkar laipui programme duan reng reng chu ran awm zat nena inmila siam leh sum ruahman ṭhin a nih avangin data dik tak neih a ṭul thu a sawi a, "Data dik leh rintlak, innghahna tlak nei tura ṭan la turin enumerator an pawimawh," a ti.

AH&Vety department hi sorkar laipuia Ministry of Animal Husbandry, Dairying & Fisheries hnuaia awm a nih avangin, ran chhiarpui neihna turah AH&Vety department leh Fisheries department-a mithiamte'n training an nei ta a ni. Master Trainers Training zawhah district khawpui tinah district level training buatsaih leh a ni ang.

India rama ran chhiarpui, Quinquennial Livestock Census hi kum 5 danah ram pumah neih ṭhin a ni a, in tinah lutin, ran vulh zawng zawng chipchiar taka chhiar a ni ṭhin. Mizoramah pawh ran chhiarpui hi hlawhtling taka nei tura inbuatsaih niin, in tina luta ran chhiar turin enumerator-te khaw chan bik ruat vek a ni tawh a; enumerator-te chuan an khaw chan ṭheuhah ran an chhiar ang.

19th. Livestock Census 2012-a Mizorama ran chhinchhiah zat
1. Bâwng (cattle) - 38,268
2. Láwi (buffalo) - 5,028
3. Sial (mithun) - 3,283
4. Beram (sheep) - 640
5. Kêl (goat) - 22,079
6. Vawk (pig) - 2,66,646
7. Sakawr (pony) - 694
8. Ui (dog) - 46,833
9. Sazupui (rabbit) - 1,053
10. Sai (elephant) - 3
11. Ar (poultry) - 12,60,298