NSQF zawm ṭulna inzirtir
Skill development training petute tana National Skill Qualification Framework (NSQF) zawm a ṭulna chungchang inzirtirna, 'Advocacy Workshop on NSQF' chu nimin khan Aijal Club-ah buatsaih a ni a, Finance secretary Lalnunmawia Chuaungo-in a hmanpui.
Lalnunmawia Chuaungo chuan, tunlai thiamna ṭhang chak lutuk avang leh mipui mamawh a inthlak danglam zung zung avangin skill training-a zirnate uluk taka kalpui a ngaih thu a sawi a, "Zirlaite'n skill training an neih hnuin zirna sang zawk zir leh turin kum an hloh ṭhin. Chu chu siamṭhat a nih theih nan training-na atana hun an hman zah leh chu mi hun chhunga sikul pangaia pawl an sawn theih zah angte pawh enge maw ti zawnga siam rem a ngai a ni," a ti.
Inkhawm hi Labour, Employment, Skill Development & Entrepreneurship department (LEDSE) secretary Zothan Khuma'n a kaihruai a; LEDSE director Lalhmunsanga Hnamte-in State Skill Landscape & Policy chungchang a sawifiah.
Report-a tarlan danin, tun dinhmunah hna thawk thei rual kum 14 leh kum 59 inkarte chu Mizoram mipui zawng zawng aṭanga 60.3% an ni. Mizoram sorkar department 14-in skill training an kalpui mek a, sorkarin a pawmpui skill training pe thei, Skill Development Initiative Scheme, Ministry of Skill Development & Entrepreneurship, Government of India hnuaia Online Registration nei, Vocational Training Providers (VTP) 24 leh vocational subject lak theihna higher secondary school 25 a awm mek a ni.