Aizawlah sipai lâk rûnpui ṭan a ni

October 3, Nilaini aṭang khan Rajiv Gandhi Stadium, Mualpuiah sipai lâk rûnpui ṭan a ni a, nimin khan Mizoram Youth Commission (MYC) chairman Joseph Lalhimpuia'n a tlawh.

MYC Chairman chuan, kumina sipai lâk rûnpui atan MYC-in Mizo ṭhalai, sipai ṭan tumte tan August 20, 2018 aṭangin pre-recruitment training a buatsaihsak thu a sawi a, "Indian Army Recruitment Rally, 2018 hi a tirah chuan November chawhnu lama neih tura ruahman a ni nâin, MYC ngenna angin October thla tìra neih turin Headquarters Recruitment Zone, Shillong chuan min sawn hmasak a, a lawmawm hle a ni," a ti.

MYC-in a buatsaih Pre-Recruitment Training hi Mizorama district zawng zawngah kalpui a ni a, Mizo ṭhalai sang télin coaching class hi an chhim a, subject hrang hrang zirtir turin mithiamte rawih a ni.