KHAWTHLIR

Thisen pe
Bethlehem Vengthlang Branch KṬP chuan an din champha vawi 24-na lawm nan nimin khan an Kohhran Hall-ah blood donation camp an huaihawt a, mipa 20 leh hmeichhia pathumin Synod Hospital tan thisen unit 23 an pe.

Tuichang bial ruak
Mizoram Legislative Assembly Secretariat chuan Otober 3, Nilaini khan notification a tichhuak a; Tuichang constituency chu bialtu MLA Lalrinliana Sailo-in Speaker hnena bànna a thehluh avangin, The Rules of Procedure and Conduct of Business in Mizoram Legislative Assembly-a Rule 194(3) hmangin October 3, 2018 aṭangin a ruak tih an tarlang.

Lak luh khap
Serchhip bawrhsap Sangchhin Chinzah chuan thupek chhuahin, vawk hri lêng vanga an district-in buaina an tawh loh nan ṭhenawm ram leh district dang aṭanga vawk leh vawk sa aṭanga thil siam reng reng lak luh a khap. Thupek hian thla hnih chhung a huam ang.

Minister-in hawng
Khawbung khuaa 33kV Sub-Station bun thar chu October 3, Nilaini khan minister Lal Thanzara'n a hawng. Khawbung 33kV Sub-Station hi State Plan Assistance cheng nuai 397.25 sênga siam a ni.

Lungphùm phúm
Champhai khaw dáia lui, Keilungliah lui khuaha recreation centre leh dam reservoir siamna tur lungphùm chu nimin khan bialtu MLA TT Zothansanga'n a phúm. Recreation centre leh reservoir siam nan hian Non Lapsable Central Pool of Resources (NLCPR) aṭangin cheng nuai 1988.00 hmuh a ni.

Nawrh chhunzawm
Mizoram Maxicab Owners Association (MMCOA)-in maxicab chuan man tihsan leh all Mizoram permit siam leh phûta October 3, 2018 aṭanga tiam chin awm loa Mizoram puma nawrh an huaihawt chu an la chhunzawm zel a; thu lawmawm an la dawn loh avangin vawiinah pawh maxicab-te an la ding zel dawn. MMCOA president C Lalthanmawia chuan, an nawrhna chu an chhunzawm zel dawn thu leh sorkar aṭanga thu lawmawm an hmuh hma chuan maxicab an tlan dawn loh thu a sawi a; an nawrhna chu maxicab-te'n an zawm ṭha hle niin a sawi bawk.