MNF-ah Lalrinliana Sailo lawm luh a ni ; Mipuiin Congress an bye bye mek - Zorama

Minister leh MLA hlui Lalrinliana Sailo chuan MNF party a zawm hnuah nimin khan Mizo Hnam Rûnah lawm luh a ni a; a lawm luttu Zoramthanga, MNF president chuan, Congress sorkar chu mipuiin an bye bye mek niin a sawi.

MNF President chuan, Congress party chu an hotu lian tam takte nen tihdam theih an nih tâk loh avangin ICU-ah an zâwn luh thu sawiin, "ICU-a luhpui ve duh lo chuan an chhuahsan ta chum chum mai. A rei ang a, ICU-a lut ve duh loa chhuak an pung ruih ruih zel dawn. Kohhran, NGO, sorkar hnathawk, zirlai leh mipuite chuan an inzâwn lut kan thlir ṭhuap ta mai a nih hi. Zoram mipuiin Congress sorkar chu kan bye bye liam mek ta a ni," a ti.

MPCC general secretary hlui Lalrinliana Sailo chuan, Congress party a chhuahsan hnuah tu nge zui tlak ang, tia ngaihtuahna a sên nasat thu sawiin, "MNF party hi ram leh hnam development kawngah an sorkar lai khan hma an la nasa em em a, tunah Central lamah an thawhpui theih âwm an sorkar tâkah phei chuan ram leh mipuiin nasa takin hma kan sawn ang tih ringin kan rawn kal a ni," a ti a; inthlan puan a nih hunah miin Congress an chhuahsan sup sup dawn niin a sawi.

MNF-in an sorkar huna an tih tur an ziahna Socio Economic Development Programme (SEDP)-ah hnam damna a awm nia sawiin Lalrinliana Sailo chuan, "Rorelna dik leh ṭha kenkawh an tumnate hi a ṭha hle. Congress-ah chuan cabinet minister dangte pawhin super minister an ning.

MNF hotute chuan mipui leh ram tana ṭha tura an ngaihte an ti mai ṭhin. Chu bakah, Congress chuan an vice president-te paih thiam tak an nei a, MNF chu an hruaitute hi lung lian tihnghîn theih loh ang mai an ni," a ti.

MPCC vice president hlui leh Home minister hlui R Lalzirliana pawhin thu sawiin, Congress sorkar term hmasaah zu zawrh chungchang Cong­ress Legislature Party (CLP)-in an rel thu sawiin, "Kan President-in Mizoram Kohhran Hruaitu Committee (MKHC)-te a ráwn a, anni chuan zu zawrh ṭha an tih loh thu an hrilh. Chuvang chuan term hmasaah zu kan zuar lo," a ti a; an term hnihnaah zu zuar tura hmalak ṭan a nih leh thu a sawi.

R Lalzirliana chuan, zu an zawrh tur chungchanga kohhran an ràwn loh tur thu a sawi chungchang sawifiahin, "MKHC-te a hmain kan ráwn tawh a, kan hotute'n zawrh an tih leh avangin engtikahmah MKHC-te'n an remti dawn lo tih kan hriat avangin ràwn kher a ngaih loh thu ka sawina a ni.

Hemi chungchang hi MKHC hruaitute pawh ka hrilh. Zu zawrh chungchangah hian kohhran hian a hmai tibâl lo se ka duh vang a ni a, MKHC-te pawhin min hriatthiampui khawpin ka hria," a ti.

MNF thuchhuah tarlan danin, inkhawmah hian MPCC hruaitu hlui te, AMC-a Congress leh MPC candidate hluite leh zirlai hruaitu hluite an lawm lut a ni.