Hoarding târ lo turin ngen

Mizoram Peoples' Forum (MPF) chuan kum­ina Mizoram Assembly inthlanpui vuakvetah hoar­ding siama târ lo turin political party tinte an ngen a, an ngenna chu political party tinin an tihhlawhtlin ngei an beisei thu an sawi.

MPF general secretary Rev.Dr R Lalbiakmawia chuan, MPF leh political party-te'n Thawhhona Thuthlung an siam laiin flag, banner leh poster siam dan tur leh târ zat tur mumal takin an siam tih an sawi a, "Mahse, hoarding siam chungchang kan lo sawi tel hauh lo mai a. MPF BEC chuan political party hrang hrang hruaitute hnenah hoarding siam lo tura ngenna siam ni se tiin a rel a. Hei hi party hrang hrang general secretary-te hnenah ngenna lehkha pek vek a ni," a ti.

MPF General Secre­tary chuan, MPF ngenna ngai pawimawhin Mizo­ram Pradesh Congress Committee chuan, 'MPF min ngenna hi zahawm kan ti a, hoarding siam lo turin kan inhriattir a ni,' an ti niin a tarlang a; political party dangte pawhin an tihhlawhtlin ngei an beisei tlat thu a tarlang bawk.