Candidate chang lote pawh lâwm turin Congress president Hawla'n a chah

Congress party president Lal Thanhawla, chief minister ni bawk chuan, kumina Mizoram inthlanpui awm turah candidate nih beisei chunga chang lo te, MLA ni lai zingah candidate ni tawh lo turte an awm theih thu sawiin, chu'ng karah chuan an party mite chu lawm nachang hre turin a chah.

Nimina Congress Bhavan-a inkhawmah Lal Thanhawla chuan, Mizoram inthlanpui atana an candidate turte siam fel mek a nih thu leh tam tak chu tihfel a nih tawh thu a sawi a, "Candidate ni tum, remchang lo te, MLA ni lai, nih zui remchang ta lote a awm theih. Chuti chung chuan lawm nacháng hria ila, party-in min tihsak tawhte hi hriat a ṭha... Kan inhriatthiam a ngai," a ti.

MLA nih chu mi tu emaw chan reng tur a ni lo tih sawiin Lal Thanhawla chuan, "Kan ta reng tur a ni bik lo; chelh chang a awm ang a, chelh loh chang a awm... Lawm chunga rawngbawl tur kan ni," a ti a; MLA chu in nih chhâwk a ngaih thu leh nihna âtchilh loh chuan engkim a tawrh theih thu a sawi.

MPCC President chuan, politics chu mahni leh vua leh vángte tan a ni lo tih sawiin, "Ram tan a ni a, mahni sahmim tihpuarna tur a ni lo. Chutianga ngaite chu an ding chhuak ngai lo," a ti.

Home minister aṭanga báng ta R Lal­zirliana leh MLA Lalrinliana Sailo chung­changah Lal Thanhawla chuan, "An uiawm hle a. Mahse, engati nge kum hnih/thum kal ta aṭang khan mi danin an rîm? Engati nge rîm theiha an awm?" a ti a; hun eng emaw ti aṭang tawh khan party dangin an rîm tawh a, ngaihṭhat loh nacháng an lo hre lo tih a sawi.

Lal Thanhawla chuan, R Lalzirliana leh Lalrinliana Sailo-te chu Congress party-in an duhsak hle ṭhin tih sawiin, "Tu leh fate zingah pawh duat leh duhsak apiangte hi kawhmawh bàwl chíng an ni thei. Kan duhsaknaah lawm nacháng an hre lo a nih chuan in mawh a ni lo," tiin an party mite a hrilhfiah.

MPCC President chuan Congress sor­karah hmasawnna lian tham a thleng ṭhin tih sawiin, Bairabi-a rêl luhtir, Sairang rêl kawng siam mek, Lengpui Airport, Tuirial HEP, State Referral Hospital, MIMER leh thil dangte a sawi lang a, "Heng zawng zawng hi in vote chhuah a ni a, Lalpa'n a hmang nasa che u a ni," a ti.

Congress party President chuan, an party aṭangin chhuak awm mah se, mi tam takin an zawm thar reng niin a sawi a, "Mi chhuahsantu an awm laia kan hlim reng te, kan pung zelte hi kan ṭhatna turin Pathianin a rel vang a ni. Boruak ṭha kan neih hi inthlan thlengin a vawngṭha rengtu tur kan ni," a ti a; an party mite chu a dinhmun a ṭhat thu leh sorkar leh tura buatsaih mek an nih thu a hrilh.

Minister PC Lalthanliana pawhin thu sawiin, Congress party chu Pathianin sorkar leh turin a buatsaih mek niin a sawi a, "MNF-te hi sorkar turin a buatsaih rih lo. Pu Zoramthanga hian East hi a buaipui fo a, a lo tiam tawh Switzerland of the East chu a hlawhchham tawh a. Kum 2013-ah East Tuipui-ah a hlawhchham tawh leh a, kuminah Aizawl East I-ah a ding dawn a, a lo hlawhchhampui ṭhin East bialah hian a hlawhchhamin a tla leh ngei ang," a ti.