KHAWTHLIR

ZPM V/C ding
ZPM chuan thuchhuah siamin, October 4, Ningani khan Lungmuat khuaa Congress party kaihhruai V/C chu vice president Vanlalkima leh treasurer Lalbuatsaihi ten ZPM an zawm avangin Lungmuat khuaah hian ZPM V/C a piang tih an tarlang. September thla khan Tuirial biala Kawnpui V/C-III ah ZPM V/C a piang tawh bawk niin an sawi.

KTP tawngtai
Central KṬP chuan vawiin hian Mizoram pum leh state páwna KṬP dinnaah ram tan leh ruihhlo ngaite puala ṭawngṭai rualna hun an buatsaih dawn. Ṭawngṭai rual hi Aizawlah chuan Lammualah neih tur a ni a, chawhma dar 11-ah ṭan tur niin, chawhnu dar 2 thleng hun hman tura ruahman a ni. District khawpui dangah pawh khaw pumin an hmang dawn hlawm a, thing­tlang hmun dangah pawh bial huap leh branch mal angin, an remchan dan angin an hmang ang.

Thisen pe
Isua Krista Kohhran (IKK) Ṭhalai Pawl, Aizawl City Area chuan nimin khan Vaivakawna IKK Sikul Hall-ah blood donation camp an huaihawt a; Aizawl Civil Hospital tan thisen unit 35 an pe a, a petute mipa 33 leh hmeichhia pahnih an ni. DIET, Champhai pawhin nimin khan Champhai District Hospital tan thisen unit 32 an pe a, a petute mipa 22 leh hmeichhia 10 an ni.

Zu sakna tichhia
Mizoram Police-te chuan nimin khan ruihhlo do beihpui an thlak a, Rangvamual, Phunchawng, Darlawn leh Saitual ramahte zu bilh lai leh thlawr mek eng emaw zat an tichhia. Excise & Narcotics department pawhin nimin vêk khan Phunchawng leh Rangvamualah dan loa zu siam dap beihpui an thlak a, zu bilh lai zém 87 (ṭín 2,610) an tih­chhiat bakah, rakzu litre 60 leh zu siamna bêl set 9 an man a ni.

GPDP sawiho
Nimin khan Lawngtlai DRDA assistant pro­ject officer Lalramliani hoin DC conference hall-ah Gram Panchayat Develop­ment Plan (GPDP) kalpui dan tur sawiho a ni. GPDP hnuaiah hian khaw tinin anmahni mamawh ang zela hna thawh tur ruahmanna an siam a, chumi hmang chuan line department-te'n hna an thawk dawn a ni.