Kawng zawng zawng a ṭha rual thei lo - Chief Minister

PWD Chief Engineer (Highways) office building thar chu nimin khan chief minister Lal Thanhawla'n a hawng a, Mizorama kawng zawng zawng a ṭhat rual theih loh thu a sawi.

Chief Minister chuan, PWD chu sorkar inrêlbawlnaa department pawimawh ber pawl an nih thu sawiin, "Hmasawnna ruhrel pawimawh tak tak siama thawk ṭhintu an ni," a ti a, an mawhphurhna a sàn avangin PWD-a thawkte chu inthununna ṭha tak vawng chunga rinawm leh ṭhahnemngai taka thawk ṭhin turin a chah.

Mizoram hmun hrang hrangah kawngpui ṭha awm mah se, kawng zawng zawng a ṭha rual vek thei lo tih sawiin Lal Thanhawla chuan, "A chhan hrang hrang zingah ruahsûr nasat vang leh hna thawhna hun a tam tâwk ṭhin loh avang te a ni. Kawng hmangtute pawhin, a bik takin khawpui chhungah chuan an dimdawi thiam a ṭul ṭhin," a ti.

Chief Minister chuan, PWD-a hna thawkte chu an hmabak a tam avangin chonaah la a, ṭang leh zual zawka thawk turin a chah a, "Mipui tana thawk kan ni tih inhre reng chung a, kan theihna zawng zawng nen kan tih tur chin ṭheuh tlin taka kan thawh a pawimawh a ni," a ti a; building thar ṭha tak an nei chu lawmpui thu a sawi.

PWD Chief Engineer (Highways) office building sak nan hian cheng nuai 819.30 hman a ni a, July 2016-ah sak ṭan niin, September 29, 2018-ah sak zawh a ni. A sakna sum chu Special Plan Assistance aṭanga hmuh a ni a, SPA a tawp hnuah SPP hnuaia thawh chhunzawm leh a ni.