Ram leh hnam tana huaisen turin political party-te chah

PRISM party chuan nimin khan thuchhuah siamin, hnam tlem zawk vote duh vanga ngawih hun ni loin, ram leh hnam tana ṭan ruala huaisen hun a ni tih hre turin political party tin an ngen a; vote duh vanga Mizo ram leh hnam humhalhna aupui ngam lo khawpa awm lo turin party tin an chah.

PRISM chuan, Bru hoin Mizoram sah hêk tumin autonomous district council an dil mek tih sawiin, "Hei hi engti kawng maha Mizote tana pawm theih loh a ni. Central sorkara autonomous district council an dilna a kal mek laiin, duh lohna emaw dodalna thu party dangte'n an chhuah duh miah lo hi PRISM chuan a mak kan tiin hriatthiam har kan ti. He thil hi dodal ve turin party dang zawng zawng kan ngen a ni," an ti.