ZPM hminga thil ti lo turin ngen

Zoram Peoples' Movement (ZPM) chuan thuchhuah siamin, ZPM thil tih anga ngaih theih turin social media hrang hrangah an hriatpui loha ZPM hming hmanga thuchhuah lem siam an awm thu an tarlang a; chutianga ti ṭhinte chu ti tawh lo tur leh, ZPM general headquarters hriatpuina tel lo chuan ZPM hmingan group/page siam lo turin mi tin an ngen.

ZPM chuan, ZPM tihhmingchhiat nan Facebook-ah group leh page leh Whatsapp group siam an awma an hriat thu sawiin, chu'ngte chu ZPM-in an hriatpui loh thu an tarlang a, "ZPM-in thuchhuah a siam reng rengah a chhuahtu hming leh eng department nge tih tarlan zel a ni ṭhin a; hetiang thil hi ZPM tihchhiata tihmualpho tumna mai mai a ni," an ti.

ZPM inkhawmnaah pastor, evangelist, kohhran upa leh Pathian mi hmante hunserh hmang tura an sàwm ṭhin thu sawiin, "Party politics sawi turin kan sáwm ngai lo a, kan beisei hek lo," an ti a; October 1, 2018-a ZPM inkhawma hunserh hmangtu Upa C Ngurthantluanga’n tuh a sawiah, a thu sawi ni lo ZPM thuchhuah ni âwm taka ngaih theih tura social media-a thu vawrh­ darh a awm thu te, ZPM press release-ah chuan hunserh a hman thu bak chu a thu sawi tarlan a awm loh thu an tarlang.

Sakhaw rawngbawltute’n rawng an bàwl zelna tura harsatna thlen thei zawng­a dâwt vawrh darh chu Kristian rama thleng tura an beisei ngai loh thu sawiin ZPM chuan, "ZPM tihmualpho tumna mai ni loin, Pathian pawi sawinaah kan ngai," an ti a; "Hetianga party politics tui nú hmanga Pathian rin­chhana kal mekte beih kan ni hian Zoram dinhmun chhiat tawhzia chiang takin a tarlang a ni," an ti bawk.