RTI Week hman ṭan a ni

Nimin khan Mizoram hmun hrang hrangah Right to Information (RTI) Week hman ṭan a ni a, Aizawlah chuan Synod Conference Centre-ah chief minister Lal Thanhawla'n a hawng.

Chief Minister chuan, sorkarin mipui lakah thuhrûk emaw, thurûk emaw a nei tur a ni lo tih sawiin, "Sorkar hmalakna project hrang hrangte chu mipuiin chiang taka an hriatpui a pawimawh avangin RTI Act hi sorkar inrêlbâwlnaah langtlang leh fai, chak leh awmze nei sorkar siamna hmanraw ṭha a ni. Sorkar hmalakna ṭhenkhatah pawh a ṭulnaah chuan social audit-te neih ṭhin a ni," a ti.

Sorkar department tinte chu RTI Act hmanga zawhna an hmuhte a rang thei ang bera bawhzui zel tura chahin Lal Thanhawla chuan, "Mizoram hi state dangte tan entawn tlak a nih theihna atana ṭan la turin sorkar hnathawkte ka sáwm a ni," a ti a; Mizoram chu eirukna awm lohna mai ni lo, scheme leh project kalpuite chak zawka tihlawhtlin ṭhin a nih theih sorkar hnathawkte'n hma la se a duh thu a sawi.

Chief information commissioner Lalduhthlana pawhin thu sawiin, RTI Week a ngaih pawimawhna chuan langtlang sorkar leh mipui ban phâk sorkar nih an duhna a tilanga a hriat thu a sawi a, "Mipuite'n an zawh hmasak kher ngai loa an hriat duh leh ṭulte mipui hmaa awlsam zawka chhawpchhuah a, inhrilhhriatna lama hmalak chu tunah Information Commission thil tum lian tak a ni," a ti.

RTI Week hawnaah hian department hotu te, RTI buaipuite leh college zirlaite an tel a; Week hian October 12 thleng a awh ang.