Sci-Connect-ah Mizoram pahnihna

India hmarchhak state hrang hranga science zirlaite'n science film leh an zirlai hmanga an intihsiakna Sci-Connect 2018, Agartala, Tripura-a neih chu nimin khan zawh a ni a; Mizoram aṭanga tel St. Paul's Higher Secondary School zirlaite pahnihna an ni.

Sci-Connect-ah hian hmarchhak state pariat an tel a, Assam aṭanga telte pakhatna niin, Mizoram aṭanga telte pahnihna an ni. Mizoram aṭanga telte hi St. Paul’s HSS aṭangin Simon Lalremsiama, Ankita Barua leh Niyati Basel te an ni a; an zirtirtu Lalthawmmawii leh Mizoram Science, Technology & Innovation Council-a scientific officer Davy Lalruatliana ten an hruai.

Sci-Connect-ah hian hmarchhak state-a science zirlai 9,000 chuang an tel a, state tina district hrang hrangah exam buatsaih a nih hnuah a ti ṭha zualte chu state level exam hmangin an inel leh a; state-a ti ṭhate chu hmarchhak bial huapin an intihsiak leh a ni.