Aizawlah Voters' Fest neih a ni

Nimin khan Vanapa Hall-ah Voters’ Fest hman a ni a, chief electoral officer SB Shashank leh Aizawl district election officer (DEO) Dr A Muthamma ten an hmanpui.

SB Shashank chuan, Mizorama inthlanpui awm turah mipuiin hmun pawimawh tak an chang tih sawiin, "Inthlan huna vote thlak ṭheuh hi mi zawng zawng mawhphurhna a ni," a ti a; kum 2013 inthlanah vote 83% a tla a, Mizoram chu India rama vote thlak ṭha ber zingah a tel thu sawiin, "Kum 2018 inthlanah hian hei aia ṭhaa vote thlak theih beisei a ni," a ti.

Dr A Muthamma pawhin thu sawiin, "Mipui, a bikin ṭhalai rualin vote an thlak a pawimawh em em. ECI chuan mi zawng zawng huapzo inthlanna buatsaih a tum a, chutah chuan India ram mi kan nihna angin, tih tur kan neih a, chu chu vote thlak a ni," a ti a; zirlaite chu kum 18 an tlin hunah electoral roll-a inziak lut ngei turin a chah.

Voter's Fest-ah hian deputy DEO Dr Lalhriat­zuali Ralte-in inthlan chungchanga hriat tur pawimawhte a sawifiah a; Vanlaini joint editor Lalnghinglova Hmar leh taksa lama rualbanlo Lal­buatsaiha te pawhin thu an sawi. Fest-ah hian poster insiamsiak, inhnial fiam, inlâmsiakte buatsaih a ni bawk.