Mizoram inthlan hun - November 28 PS 125-a vote thlak live-in tichhuak dawn
Mizoram Legislative Assembly inthlanpui neih hun tur chu November 28, 2018 a nih thu chief election commissioner Om Prakash Rawat chuan October 5, Inrinni tlai khan a puang ta a; Mizoram pumah Election Model Code of Conduct hman nghal a ni. Mizoram inthlanpuiah hian polling station 1,164 zinga 125-ah vote thlak lai live telecast-a pek chhuah a ni dawn.
Mizoram inthlanpui puan tâk chungchangah hian Mizoram chief electoral officer (CEO) SB Shashank chuan Inrinni tlai khan Secretariat Annexe-I conference room-ah thuthar thehdarhtute a kâwm a; inthlanpui atan hian an inbuatsaih mek zel chungin an inpeih thawkhat tawh tih a sawi.
SB Shashank chuan, inthlan puan a nih tak avangin Model Code of Conduct hman nghal a nih thu a sawi a; Model Code of Conduct-in a huam chin leh NLUP sem chhunzawm theih a nih leh nih loh zawhna chhangin, "Tunah chuan Model Code of Conduct-in thil eng emaw bik a huam leh huam loh ka sawi thei lo a, la tihchian tur a ni ang. Thil chiang sa chu, thil thar, project thar puan leh tihte phal a ni lo," a ti.
Mizoram CEO sawi danin, Mizorama Assembly constituency 40 zinga 39 chu schedule tribe (ST) tana hauh a ni a, constituency pakhat - Aizawl East-I chu hauh bik awm lo, general constituency a ni.
Tun ṭum inthlanpuiah hian electronic voting machine (EVM) ballot unit 1,859 leh control unit 1,841 hman a ni dawn a; voter verifiable paper audit trial (VVPAT) chu 1,751 hman a ni ang. State pumah police company 48 (company pakhatah police 120-130 vel an awm) leh Central armed police force company 40-te'n venhim hna an thawk dawn a; polling station zingah ven uluk ngai zual, critical polling station tlem azawng a awm.
Mizoram pumah polling station 1,164 awmin, sector 139 a awm a; polling station 1,164 zinga 125-ah inthlan vote thlak lai live telecast-a tihchhuah tur a nih thu SB Shashank chuan a sawi. Constituency tinah polling station pakhat ṭheuh chu hmeichhia hlangin an enkawl dawn a, polling station tinah taksa lama harsatna neite puitu tur volunteer an awm dawn thu a sawi bawk.
Congress party kaihhruai Mizoram sorkar ding mek hi December 16, 2013-ah lak luh a ni a, sorkar term chu kumin December 15-ah a tawp ang; kum 2013-a inthlanpuiah hian vote tla zat chu 83% a ni.
Tun ṭum inthlanah hian Mizoramah voter 7,68,181 an awm a, mipa 3,74,496 leh hmeichhe 3,93,685 an ni.
Mizoram inthlanpui
Notification chhuah hun - November 2, 2018
Nomination thehluh hun tawp - November 9, 2018
Nomination endik hun - November 12, 2018
Inhnuhdawh hun tâwp - November 14, 2018
Vote thlak ni - November 28, 2018
Vote chhiar ni - December 11, 2018
Mizorama voter awm zat
District Mipa Hmeichhia Total
Aizawl 1,36,732 1,51,590 2,88,322
Lunglei 52,155 52,775 1,04,930
Siaha 18,894 19,949 38,843
Champhai 41,933 42,837 84,770
Serchhip 23,917 25,053 48,970
Kolasib 27,832 29,325 57,157
Mamit 33,100 31,969 65,069
Lawngtlai 39,933 40,187 80,120
TOTAL 3,74,496 3,93,685 7,68,181