Maxicab nawrhna tihtawp a ni

Mizoram Maxicab Owners' Association (MMCOA)-in an thil phût chi hnih tipuitling tura Mizoram sorkar kar nana an tlan duh loh chu Election Commission of India (ECI)-in Mizoram Assembly inthlan hun a puan tâk avangin October 6, Inrinni tlai dar 5 aṭangin an titawp tih an puang.

Tarlan tawh angin, MMCOA hian maxicab chuan man tihsan leh all Mizoram permit tihtawp tawh pek chhuah leh an phût a ni. April 2018-a MMCOA Special Assembly-in a rel angin, maxicab chuan man chu km. khatah metal road-ah Rs. 3 leh metal loh kawngah Rs. 3.50-ah tihsan an phût a; chutih laiin, State Transport Authority (STA)-in rate a siam hman mek, kumin March thlaa hman ṭan chu metal road-ah Rs. 2.50 leh metal lohah Rs. 2.75 a ni thung.

An thil phût tihhlawhtlin ngiatin MMCOA hian October 3 aṭang khan Mizo­ram pumah an tlân duh lo a, Mizoram chhungah maxicab service a awm lo. Ni li chhung an tlan loh hnuah an strike chu an titawp thu an puang a, "Vawiin (October 6) tlai dar 5 aṭangin MMCOA-te'n phût neia kan nawrhna chu, election puan a nih tak avangin leh Congress Ministry-ah engmah beisei tur a awm tâk loh avangin call-off a ni tih mipuite hriattir kan ni e," an ti.

MMCOA hian lungawi lohna an lantir chhunga duty-a thawk chhuak zawng zawngte leh strike zawmtute zawng zawng chungah lawmthu an sawi a; strike vanga harsatna tâwk zawng zawng hnenah hriatthiamna an ngen bawk.