Damdawi thar ZPM ei turin mipui sáwm

Ṭangrual pawl Zoram Peoples' Movement (ZPM) chief ministerial candidate Lalduhoma chuan, Mizoramin a tihsual lian ber chu, sorkar hotute an kal dik tawh lo a ni tih a chian hle hnuah pawh campaign pui duh an la awm zel chu a nih thu a sawi a; damdawi thar - ZPM ei tawh turin mipui a sáwm.

Lalduhoma hian Inrinni khan Aizawl South-III ZPM Joint Block Conference, Samlukhaia neihah thu sawiin Lalduhoma chuan, Pathian leh mipui hmaa an thutiamah an ding lo a, an hlen lo a nih chuan zui zel tlak an ni lo tihna a nih thu a sawi a, "Kan ramin kan tihsual lian ber chu, kan pute an kal dik tawh lo a ni tih a chian fé tawh hnuah kan la campaign pui zel hi a ni. Hei hian kan ram a tichhe zo vek tawh. Zui tlak kan nih chuan min zui ula, zui tlak kan nih tawh loh hnuah chuan keini aiia ṭha zui tlak in zawng dawn nia," a ti.

Mizoram politics-ah awmna party sawn vanga hrâm dan leh au hla sawn ṭhin an awm nia sawiin Duhoma chuan, "Kan ram hian kum 32 chhungin nachhawkna min tidam thei lo, min tina zual zeltu, MNF leh Congress sorkar kan ei chhâwk a, damdawi thar ZPM hi i ei ve chhin tawh ang u," tiin Zoram mipui a sáwm.

Inkhawmah hian ZPM senior vice chairman F Rodingliana leh Aizawl South-III bial viltu RD Lalrammawia te pawhin thu an sawi a ni.

ZPM thuchhuah chuan, Sam­lukhaia ZPM inkhawmah hian Lalduhoma'n ZPM zawm thar voter 330 a lawm lut niin an tarlang a; October 5, Zirtawpni khan Then­zawlah ZPM zawm thar voter 687 a lawm lut tawh niin an tarlang bawk.