KṬP-in ram pum huap ṭawngṭai hun hmang

Kumina KṬP General Con­ference thurel bawhzuiin Central KṬP chuan October 6, Inrinni khan 'Ram pum huap ṭawngṭai' an huaihawt a; Aizawl bakah district khawpui tinah leh hmun dang eng emaw zat KṬP member-te ram tan leh ruihhlo ngaite tan an ṭawngṭai.

KṬP ram pum huap ṭawngṭai hi Aizawlah chuan Lammualah neih niin, chawhma dar 11-ah ṭan a ni a, mi 1,000 vel an tel.

Ṭawngṭai thawh khatna chu CKṬP leader Rev.Dr K Lallawmzuala'n kaihruaiin, Synod moderator Rev. F Lalrinnunga'n thuchah a sawi a; KṬP member, kohhran leh KṬP aṭanga hlá te, ruihhlo ngai te, ruihhlo zuar te, ruihhlo do kawnga hma latute leh ruihhlo ngaite enkawlna hmuna thawkte tan an ṭawngṭai.

Ṭawngṭai rual thawh hnihna chu CKṬP assistant leader Upa Rosangliana'n kaihruaiin, Synod executive secretary Rev. B Sang­thanga'n thuchah a sawi a; sual thupha chawina, Mizoram ṭhalaite tan, MLA general election pual tihte hmangin an ṭawngṭai rual a ni.

Ram pum huap ṭawngṭai hi district khawpui tinah khawpui pumpui huapin hman a ni.

Lungleiah chuan Chanmari Veng biak-inah, Champhaiah chuan Kahrawt Field-ah, Kolasib-ah chuan Venglai Kohhran biak-inah, Serchhipah chuan Leisekawt Field-ah, Mamitah chuan Bazar Veng Kohhran biak-inah, Lawngtlaiah chuan Lawngtlai Prayer Mount-ah leh Siaha-ah chuan Saiha Kohhran hall-ahte hman a ni.