KHAWTHLIR

EVM endik
Kumin MLA inthlan­a Champhai district-a hman tur voter verifiable paper audit trail (VVPAT) 40, electronic voting machine (EVM) ballot unit 20 leh control unit 55-te chu Inrinni khan endik a ni a, chumi hnuah strong room-ah dah luh nghal a ni. EVM leh VVPAT endiknaah hian ECIL company engineer, election office-a thawkte, thuthar thehdarhtute leh political party aiawhte an tel.

Lungphùm phúm
NEDP hnuaia cheng nuai 700 sénga Zarkawt Community Hall sakna tur lungphùm chu Inrinni zing khan chief minister Lal Thanhawla'n a phúm. Chief Minister ­chuan, tun hnaiah Mizoram hmun hrang hranga hall
ṭha tak tak hawn a nih thu a sawi. Zarkawt Community Hall hi kum thum chhunga sak zawh tura a ni a, chhawng ruk tur a ni.

Tui ren a ngai
PHE department hotute chuan, Aizawl châwmtu tui pump khawl lian pakhat zawk a chhiat avangin hun eng emaw ti chhung chu tui pump chhuah a tlem deuh dawn tih an tarlang a, tui renchem turin mipui an ngen. PHED chuan, khawl chhia chu pawi an tih thu leh siamṭha thuai tura theihtawp an chhuah thu an sawi.

LAD inkhawmpui
UPC (NEI) kohhrana hmeichhe pawl, Ladies Auxiliary Department (LAD), Aizawl East District chuan October 5, Zirtawpni zan khan Khawzawl Field No. 1-ah inkhawmpui an hmang ṭan a, nizan khan a ṭiak. Inkhawmpuiah hian thupui chu 'Thlaraua khatin awm rawh u' tih a ni a; mi hrang hrangin thupui an sawi. UPC (NEI) Aizawl East District LAD hnuaiah hian zûk leh hmuama fihlim mi 1,099 an awm a, chhungkaw maicham ni tin nei thei chhungkaw 700 an awm a ni.