Contract-a thawkte'n 7th. Pay an phût ; Mizoram sorkarin 7th. Pay pek a tum lo

All Mizoram Government Contract Employeess Association (AMGCEA) chuan thuchhuah siamin, 7th. Pay anga hlawh pek ve an phût thu an tarlang. Mizoram sorkar chuan a hnuaia contract-a rawih mekte chu 7th. Pay Commission recommendation zûlzuiin hlawh pek a tum lo.

Vanglaini palai zawhna chhangin Finance principal secretary Lalnunmawia Chuaungo chuan, contract employee-te hlawh pek chu state thu thu a ni tih a sawi a, "An hlawh a tlem sa avangin regular employee-te anga bithliah a rem chiah lo a, actual amount of increase chu tuna regular employee-te ang pe ve ta ila, a sang bik pek erawh a rem lo ang, kan ti. An level angin increment pe ila kan ti a, percentage-ah chuan an sang zawk ang a, total salary erawh allowance kan pek ve loh avangin regular employee-te hlawh erawh an pha lo hle ang," a ti.

Lalnunmawia Chuaungo chuan, contract employee-te increment pek tura an ruahman chu Chief Minister pawhin a pawm tawh thu leh, October 8, Thawhṭanniah pek theih an inrin thu a sawi.

Kumin June 4 leh 12-a Cabinet meeting minute-ah chuan, contract employee-te bakah, adhoc employee, employee of deficit, adhoc grant-in-aid school, autonomous district council leh state PSU-te hlawh pawm a ni a; mahse, chu'ngte hlawh tur chu 'suitable revision' tia ziah a ni.

'Suitable revision' tih chungchanga zawhna chhangin Finance Principal Secretary chuan, "An hlawh mek awm dan azirin fair and reasonable angin kan kalpui. Regular employee ho leh allowance la sa ang chu a ngaiin an kal a, contract employee bik chu 20% allowance pek an ni a, a dang an lak ve loh avangin contract bik hi an hlawh structure a dang bik a, 'reasonable and fair' thei ang ber tura kan ngaihah 'angle' hrang hrang aṭanga tehin kan kalpui a ni," a ti.

The Seventh Central Revision of Pay Rules 2018 & Notification on Revised Allowances to the Employees of Govt of Mizoram, Finance department (Pay Research Unit)-in August 16, 2018-a notification a chhuahah chuan 7th. Pay hmang ve thei lo tur tarlan a ni a; 7th. Pay hmang ve thei lo tarlan zingah - AMC leh district council-a thawk te, sorkara hun puma thawk lo te, autonomous body leh state government undertaking a thawk MPSC, MSEC, MSIC, MBSE, MKVI, ZIDCO, etc leh Assembly House-a thawkte chu a langsar zual an ni.

Hetih lai hian AMGCEA chuan October 6, Inrinni khan thuchhuah an siam a; June 4, 2018-a Cabinet meeting-in Mizoram sorkara thawk hrang hrang, contract-a thawkte pawh huama 7th. Pay revision benefit pek tura thu­tlukna siam a ni chu lawmawm an tih rualin, contract employee-te 7th. Pay pek an nih ve dawn loh thu sorkar aṭangin an dawng tih an sawi a, 7th. Pay anga hlawh pe ve turin sorkar an phût.

AMGCEA chuan, 7th. Pay pek ve an dil laiin, 6th. Pay pawh ni lo, pay phuahchawp tak mai siamsak an ni tih sawiin, "Mak kan ti a, hetiang thil hi tun hmain a la thleng ngai lo. Contract employee-te hi pay revision thar mil zela awmtir kan ni ziah a, tunah chuan hamṭhatna hrang hrang regular ho anga kan lak ve theih zawng zawng pawh a bo vek dawn a ni. 7th. Pay anga hlawh min pek ve kan phût tlat a ni," an ti.

'Equal pay for equal work' chungchangah Supreme Court-in judgement a siam tawh tih sawiin AMGCEA chuan, "State/UT tam takin an kalpui tawh a, chuvangin, 7th. Pay zûlzuia hlawh lak ve ngei hi kan chanvo niin kan hria," an ti a; sorkar tihhautak an duh loh avangin 7th. Pay-a a hniam thei ang ber an dil a, increment, dearness allowance, HRA leh SCA-te an dil tel lo tih an sawi.

AMGCEA chuan, contract employee-te chu open advertisement hmanga DPC/MPSC kaltlanga lak an nih thu te, sorkarah mawhphurna tam tak an neih thu te, sorkar tan ṭhahnemngai tak leh hah taka an thawh thute an sawi a, "Contract employee-te hlawh hi kum 2013 aṭang khan a pung tawh lo," an ti.