Kumari Satyawati Didiji piancham lawmna Governor-in a hmanpui
Governor Kummanam Rakjasekharan chuan Brahma Kumaris Rajyoga Education Centre, Ṭhuampuiah Rajyogini Brahma Kumari Satyawati Didiji pian champha vawi 87 lawmna a hmanpui. Rajyogini Brahma Kumari Satyawati Didiji hi Mizoram, Upper Assam, Nagaland leh Arunachal Pradesh-ah Brahma Kumaris Director a ni.
Governor chuan, Brahma Kumaris-te'n kum 1937 aṭangin ram tan hna an thawk tih sawiin, "He movement hmuchhuaktu Dada Lekhraj Kripalani hna chhunzawmin, an pawl hian ram tan thil ṭha tam tak an ti a. Brahma Kumari-te hian sik leh sá chhe zel tur ven hna te, mi rethei ṭanpui te, zirna, hriselna leh kawng dang tam takah khawtlang tana thil ṭha an thawk a ni," a ti.
Brahma Kumaris pawlah hian hmeichhiate'n hmun pawimawh tak an luah a, sakhua mai piah lamah zirna, hriselna lam hawi leh khawtlang nun siamṭhatna lamah hma an la a ni.