Ruihhlo laka ṭhalaite fihlim theihna atan Lungleiah rally buatsaih a ni

New Economic Development Policy (NEDP) hnuaia sorkarin ruih theih thil laka ṭhalaite an fihlim theihna tura rua­hmanna a siam, 'Project Himna - Mizoram Against Drugs, Alcohol and Tobacco (MADAT) hmalaknain Royal Knights Bullet Club, Lungleite'n Inrinni khan Lunglei khawpuiah rally an buatsaih a, Lunglei DC Dr Ankita Chakravarty-i'n DC pisa kawt aṭangin a vai liam.

Dr Ankita Chakravarty chuan, Himna-MADAT hmalaknaa Royal Knights Bullet Club ṭhalaite'n ruihhlo, zu leh vaihlo ṭhat lohzia au chhuah­puia rally an nei chu lawmawm a tih thu a sawi a, "Ruihhlo, zu leh vaihlo hian kan taksaah natna hrang hrang a thlen a, chhungkuaah sum leh paiah harsatna tam tak a thlen bawk a ni," a ti.

Lunglei Civil Hospital medical superintendent Dr SR Ngurchamliana pawhin AOC Petrol Pump-ah thu sawiin, "Ṭhalaite'n ruihhlo hrang hrang an tihte an chhiat phah hle a, chumi do nan chuan kan ramin a ṭha zawnga ke kan pên theih nan tiin Mizoram sorkar chuan hetiang hun hi a buatsaih a ni," a ti a; ruihhlo vangin HIV/AIDS a hluar phah thu a sawi bawk.