MZP-in mi 32 hnenah Rs. 5,44,381 an sem

Mizo Zirlai Pawl (MZP) general headquarters chuan kumin March thlaa Bairabi Zophaia buainaa hliamte leh an thil hlohte phuhrûkna tura vehbûr an khawnah Rs. 5,44,381 an hmu a, chu'ngte chu October 6, Inrinni khan mi 32 hnenah an hlan.

Thawhlawm an hmuhte semna inkhawm hi MZP Pisapui conference hall-ah neih a ni a; Rs. 5,44,381 an khawn chhuah chu mi 32 hnenah pawisa faiin an sem a ni. Bairabi Zophaia bung­rua an hmansak Bairabi YMA chu dekchi lian pali an leisak a, mi dang ta an hawh dekchi lian pali an lei bakah, commercial gas cylinder leh Bairabi khawtlang mutbu 20 man an hlan bawk.

MZP chuan, Bairabi Zophaia buainaa bungraw chhia leh thil bo tih hmaih palh leh report dawn loh a awm chuan a ṭul anga an pek zel dawn thu an tarlang.

MZP president L Ram­din­liana Renthlei chuan, thisen ­chhhuak leh jail bang zût khawpin MZP-in an theihna an hmang ve ṭhin tih a sawi rualin, a tàwpna chu sorkar thuneitute a nih zel thu a sawi a, "A hlawh­tlinna tak tak chu sorkar a ni zel. Mizoram hi chîmral kan la ni lo a, chhan theih a la ni a, chhan tlak a la awm. Zoram chhan tur­in ram hruaitu huaisen leh rin­tlak kan neih a ngai. MZP chuan Mizoram leh Assam ramri chinfel a nih thuai theih nan hma a la chhunzawm zel dawn a ni," a ti.